މެދުއިރުމަތީގައި މިހާރު ހިނގަމުންދާ ނުރައްކާތެރި ހަމަނުޖެހުންތަކުގެ މި ދަނޑިވަޅުގައި، ދިވެހިރާއްޖެއިން މަސައްކަތްކުރާނީ ޢަރަބި އިސްލާމީ ޤައުމުތަކާއެކު އެއް ބްލޮކެއްގެ ގޮތުގައި، ވަރުގަދަ އެކަތިގަނޑެއްގެ ގޮތުގައި ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވެވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވަނީ، މި ހަނގުރާމައިގައި ދެމުންދާ ޙަމަލާތައް ހަރުކަށި އިބާރާތުން ކުށްވެރިކުރައްވާފައެވެ. އަދި މިއީ މުޅި އިސްލާމީ އުންމަތަށް ލިބިގެންދިޔަ ނުހަނު ބޮޑު ހިތާމައެއްކަމަށާއި، މި ހަމަނުޖެހުންތަކުގައި ގެއްލިގެންދާ ކޮންމެ މުސްލިމެއްގެ ފުރާނައަކީ މުޅި އުންމަތަށް ލިބޭ ފޫނުބެއްދޭވަރުގެ ގެއްލުމެއްކަމަށް އެމަނިކުފާނު ސިފަކުރެއްވިއެވެ. ދިވެހިރާއްޖެ އަބަދުވެސް ދެމިއޮންނާނީ އިސްލާމީ ޤައުމުތަކާއެކު އެއް ރޫޙެއްގައިކަމުގެ ޔަޤީންކަން އެމަނިކުފާނު ދެއްވިއެވެ.
އިރާނުން ދެމުންދާ ޙަމަލާތަކަށް އިޝާރާތްކުރައްވައި ރައީސުލްޖުމްހޫރިއްޔާ ވިދާޅުވީ، ދިވެހި ރައްޔިތުން ތިބީ ޢަރަބި ޤައުމުތަކުގެ ރައްޔިތުންނާއެކުގައިކަން ހާމަކުރެއްވުމުގެ ގޮތުން ރޭގެ ވަގުތެއްގައި ޔުނައިޓެޑް ޢަރަބް އެމިރޭޓްސް (ޔޫއޭއީ) ގެ ރައީސަށް ފޯނުން ގުޅުއްވައި، ރާއްޖޭގެ ފުރިހަމަ ތާއީދު އެ ޤައުމަށް އޮތްކަން އަންގަވާފައިވާނެ ކަމަށެވެ. މީގެއިތުރުން، ސަޢޫދީ ޢަރަބިއްޔާ، ޤަތަރު، ބަހްރެއިން އަދި އޮމާން ފަދަ ޤައުމުތަކުގެ އިސްވެރިންނަށް މިއަދު ގުޅުއްވައި، ދިވެހިންގެ ތާއީދާއި އެއްބާރުލުން އެ ޤައުމުތަކަށް އޮތްކަން ހާމަކުރައްވާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
މި ހަނގުރާމައިގެ ސަބަބުން ރާއްޖެއަށް ކުރިމަތިވެދާނެ ގޮންޖެހުންތަކަށް އަލިއަޅުވާލައްވަމުން ރައީސުލްޖުމްހޫރިއްޔާ ފާހަގަކުރެއްވި ގޮތުގައި، ރާއްޖޭގެ ފަތުރުވެރިކަމާއި، ކާބޯތަކެތީގެ އިތުރުން ތެޔޮ އެތެރެކުރުމުގައި މެދުއިރުމައްޗަށް ބަރޯސާވެފައިވާ މިންވަރު ބޮޑުކަމުން، މި ހަމަނުޖެހުންތަކުގެ އަސަރު ރާއްޖެއަށް ކުރާނެއެވެ. އެހެންކަމުން، މި ދަނޑިވަޅުގައި ޤައުމީ މަސްލަޙަތު ހިމާޔަތްކުރުމަށްޓަކައި ސަރުކާރުން ގިނަގުނަ މަސައްކަތްތަކެއް ކުރައްވަމުން ގެންދަވާކަމަށް އެމަނިކުފާނު ވިދާޅުވިއެވެ.
މިއަދު ބޭއްވުނު މި ބައްދަލުކުރެއްވުމަކީ، ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ވަޢުދުވެވަޑައިގެންނެވި ފަދައިން، ކޮންމެ ހަފުތާއެއްގެ ހޯމަ ދުވަހު ނޫސްވެރިންނާ ބައްދަލުކުރެއްވުމަށް ނިންމެވި ނިންމެވުމުގެ ދަށުން ބޭއްވުނު ފުރަތަމަ ބައްދަލުވުމެވެ. ރައީސުލްޖުމްހޫރިއްޔާ ވަނީ ދަތުރުފުޅެއް ކުރައްވަން ޖެހިވަޑައިގަތުން ނުވަތަ ރަސްމީ ބަންދު ދުވަހެއް ފަދަ ކަމެއް މެދުވެރިނުވާނަމަ، ކޮންމެ ހަފުތާއެއްގެ ހޯމަ ދުވަހުގެ ހެނދުނު 10:00 އިން 11:00 އަށް ނޫސްވެރިންނާ ބައްދަލުކުރައްވާނެކަމުގެ ޔަޤީންކަން ދެއްވާފައެވެ.
ކޮމެންޓު ފޮނުވާ