ހުޅުމާލޭ ދެވަނަ ފިޔަވަހީގައި ސަރުކާރުން ތަރައްޤީކުރުމަށް ނިންމާފައިވާ އިންޑޯ ފުޓްސަލް ކޮމްޕްލެކްސްގެ އަމަލީ މަސައްކަތް، މި ހިނގާ މާރިޗު މަހުގެ ތެރޭގައި ފަށާނެކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ކުޅިވަރު ވުޒާރާގެ މަސައްކަތްތަކާ ގުޅޭގޮތުން މައުލޫމާތު ދެއްވަމުން ވަޒީރު ފާހަގަކުރެއްވި ގޮތުގައި، މި މަޝްރޫއު ފެށުމަށްޓަކައި ބޭނުންވާ ބަޖެޓާއި މަސައްކަތް ކުރާނެ ފަރާތްތައް މިހާރު ވަނީ ހަމަޖެހިފައެވެ. އަދި އަމަލީ މަސައްކަތް ފެށުމުގެ ކުރިން ފުރިހަމަކުރަންޖެހޭ އެންމެހައި ކަންކަން މިހާރު ވަނީ ނިމިފައެވެ. މި ކޮމްޕްލެކްސް އެޅުމަށް ހުޅުމާލެއިން ބިން ހަވާލުކުރުމުގެ އެއްބަސްވުމުގައި ސޮއިކޮށްފައިވަނީ 2025 ވަނަ އަހަރުގެ ފެބްރުއަރީ މަހުގެ 24 ވަނަ ދުވަހު ކަމަށްވާއިރު، އޭގެ ގާތްގަނޑަކަށް އަހަރެއްހާ ދުވަސް ފަހުން މިހާރު މިވަނީ އަމަލީ މަސައްކަތް ފެށުމުގެ މަރުހަލާއަށް އައިސްފައެވެ.
ރާއްޖޭގެ ގައުމީ ފުޓްސަލް ޓީމުން ފުރަތަމަ ފަހަރަށް ސާފް ޗެމްޕިއަންޝިޕް ކާމިޔާބުކޮށް ތާރީޚީ ކާމިޔާބީއެއް ހޯދާފައިވާއިރު، އިންޑޯ ޕިޗެއް ނެތުމުގެ ދަތިކަން ކުޅުންތެރިން ވަނީ ވަރަށް ބޮޑަށް ފާހަގަކޮށްފައެވެ. އެހެންކަމުން، ބައިނަލްއަޤްވާމީ ފެންވަރުގެ މުބާރާތްތައް ބޭއްވޭ ފެންވަރަށް ތަރައްޤީކުރާ މި ކޮމްޕްލެކްސް ވެގެންދާނީ ފެންވަރު ރަނގަޅު ކުޅުންތެރިން އުފެއްދުމަށާއި ގައުމީ ޓީމު އިތުރަށް ހަރުދަނާކުރުމަށް ލިބިގެންދާނެ މުހިންމު ވަސީލަތަކަށެވެ.
ސަރުކާރުގެ ހަފްތާ 14 އެޖެންޑާގައި ހިމެނޭ މި މުހިންމު މަޝްރޫއުގެ ދަށުން ގާއިމުކުރާ ކޮމްޕްލެކްސްގައި ޓްރެއިނިންގ ހަތަރު ޕިޗު ހިމެނޭނެއެވެ. މީގެ އިތުރުން ހުޅުމާލޭ ފުރަތަމަ ފިޔަވަހީގައި އެޅުމަށް ނިންމާފައިވާ ނެޓްބޯލް ކޮމްޕްލެކްސްގެ އަމަލީ މަސައްކަތް ފެށުމުގެ ކަންކަންވެސް ބާރު ސްޕީޑެއްގައި ކުރިއަށްދާނެކަމުގެ ޔަގީންކަން ވަޒީރު ވަނީ ދެއްވާފައެވެ.
ކޮމެންޓު ފޮނުވާ