އޮންލައިންކޮށް ދައްކަން ނޭނގޭ މީހުންނަށް ކައުންޓަރުތަކުން ޒަކާތް ބަލައިގަންނަން ފަށައިފި

މޯލްޑިވްސް ޒަކާތު ހައުސްއިން މިއަހަރުގެ ފިޠުރު ޒަކާތް ނަގުދު ފައިސާ އަދި ކޭޝް ކާޑު މެދުވެރިކޮށް ބަލައިގަންނަން ފަށައިފިއެވެ. މިއީ އޮންލައިން ވަސީލަތްތައް މެދުވެރިކޮށް ޒަކާތް ދެއްކުމަށް އަހުލުވެރި ނޫން ފަރާތްތަކަށް ލުއިފަސޭހަކޮށްދިނުމުގެ ގޮތުން ހުޅުވާލި ފުރުޞަތެއް ކަމަށް އެ އިދާރާއިން ހާމަކުރެއެވެ.

އޮންލައިންކޮށް ނޫން ގޮތްގޮތަށް ޒަކާތް ދައްކަން ބޭނުންވާ ފަރާތްތަކަށް މާލޭގައި މި އިންތިޒާމު ހަމަޖެހިފައިވަނީ އިސްލާމީ މަރުކަޒުގެ ޖަލްސާކުރާ މާލަމުގައި ޤާއިމުކޮށްފައިވާ ޚާއްޞަ ކައުންޓަރުތަކުންނެވެ. އެތަނުން ނަގުދު ފައިސާގެ އިތުރުން ކޭޝް ކާޑުންވެސް ޒަކާތް ދެއްކޭނެއެވެ. މި ޚިދުމަތް ދިނުމަށް ހަމަޖެހިފައިވަނީ ފެބުރުވަރީ 22 އިން މާރިޗު 9 ގެ ނިޔަލަށް، ރަސްމީ ބަންދު ނޫން ކޮންމެ ދުވަހަކު ހެނދުނު 10:00 އިން މެންދުރު 13:00 އަށެވެ. އަދި މާރިޗު 10 އިން 19 އަށް، ހުކުރު އަދި ހޮނިހިރު ފިޔަވައި ކޮންމެ ދުވަހަކު 11:00 އިން 14:00 އަށް ކައުންޓަރުތަކުން ޒަކާތް ބަލައިގަންނާނެއެވެ.

އަތޮޅުތެރޭގެ ރަށްރަށުގައި ނަމަ މި ޚިދުމަތް ލިބޭނީ އެރަށެއްގެ ކައުންސިލް އިދާރާއިންނެވެ. މާލެއެކޭ އެއްގޮތަށް ރަށްރަށުގައިވެސް ނަގުދު ފައިސާއިންނާއި ގޮވާމުން ޒަކާތް ދެއްކުމުގެ އިންތިޒާމު ކައުންސިލްތަކުން ވަނީ ހަމަޖައްސާފައެވެ. ކައުންސިލްތަކާއި އިސްލާމީ މަރުކަޒަށް ވަޑައިގެން ނަގުދު ފައިސާއިން ޒަކާތް ދެއްކުމުން، މުވައްޒަފުން އެ މުޢާމަލާތް "ފިޠުރު ޕޯޓަލް" ގައި ރެކޯޑުކުރާނެއެވެ. އަދި ފައިސާ ދައްކައި ނިމުމުން، ޒަކާތާއި ޞަދަޤާތުގެ ގޮތުގައި ދެއްކި ޖުމްލަ އަދަދު ކަށަވަރުކޮށްދޭ އެސްއެމްއެސްއެއް ވަގުތުން އެ ފަރާތަކަށް ލިބިގެންދާނެއެވެ.

ކައުންޓަރުތަކުން ޚިދުމަތް ދޭން ފެށި ނަމަވެސް، ރަމަޟާން މަހުގެ ފުރަތަމަ ދުވަހުން ފެށިގެން އޮންލައިންކޮށް ޒަކާތް ދެއްކުމުގެ ފުރުޞަތު ވަނީ ހުޅުވާލާފައެވެ. ދިރާގު، އުރީދޫ، އެމްއައިބީ، ބީއެމްއެލް، ފަހިޕޭ، އަވަސް އެޕް އަދި ބަނޑޭރި ޕޭ މެދުވެރިކޮށް ގޭގައި ތިބެގެން ފަސޭހަކަމާއެކު ޒަކާތް ދެއްކޭނެއެވެ. މީގެ ތެރެއިން ބަނޑޭރި ޕޭ އާއި ފަހިޕޭ މެދުވެރިކޮށް ރަމަޟާން މަހުގެ އެންމެ ފަހު ދުވަހާ ހަމައަށް ޒަކާތް ދެއްކޭއިރު، އެހެން ޕްލެޓްފޯމްތަކުން ޒަކާތް ބަލައިގަތުމަށް ހަމަޖެހިފައިވަނީ ރަމަޟާން މަހުގެ 27 ވަނަ ދުވަހުގެ ހެނދުނު 06:00 އާ ހަމައަށެވެ.

މިއަހަރު ފިޠުރު ޒަކާތުގެ ގޮތުގައި ދައްކަން ޖެހޭ މިންވަރު ކަނޑައަޅާފައިވަނީ އެބަޔަކު އާންމުކޮށް ކައިއުޅޭ ހަނޑުލުގެ ބާވަތުން ބޮލަކަށް 2.4 ކިލޯގެ މިންވަރެވެ. އެގޮތުން އާދައިގެ ހަނޑުލުންނަމަ 12 ރުފިޔާ، ތައިލެންޑް ހުދު ހަނޑުލުންނަމަ 53 ރުފިޔާ، އަދި ބާސްމަތީ ހަނޑުލުންނަމަ ކޮލިޓީއަށް ބަލައި 77 ރުފިޔާއިން ފެށިގެން 136 ރުފިޔާއާ ދެމެދުގެ އަދަދެއް ދައްކަން ޖެހެއެވެ. މީގެ އިތުރުން އާދައިގެ ފުށުންނަމަ 10 ރުފިޔާ އަދި އާޓާ ފުށުންނަމަ 75 ރުފިޔާ ދައްކަން ޖެހޭނެ ކަމަށް ޒަކާތު ހައުސްއިން މަޢުލޫމާތު ދެއްވައެވެ. ފިޠުރު ޒަކާތަކީ ރޯދަ މަސް ނިމުމާއެކު ފަޤީރުންނަށް ދޭންޖެހޭ މާއްދީ އެހީތެރިކަމަކަށް ވާއިރު، މި ފައިސާ ބަހަނީ ފަޤީރުންގެ ގޮތުގައި ރެޖިސްޓްރީކޮށްފައިވާ ފަރާތްތަކަށެވެ.