ކ. ދޫނިދޫ ކައިރިން ދަތުރުކުރަމުންދިޔަ ކަންނެލި ދޯންޏެއްގައި އަލިފާން ރޯވެ، އެ ދޯނި އަޑިއަށް ދިއުމާ ގުޅިގެން އެ ސަރަހައްދުން ދަތުރުކުރާ ފަރާތްތަކުން ސަމާލުވުމަށް އެމްއެންޑީއެފް އިން އިލްތިމާސްކޮށްފިއެވެ.
"ފްރެޝް ފްރޮމް ދަ ސީ" ނަމަކަށް ކިޔާ މި ދޯނި އަޑިއަށް ގޮސްފައިވަނީ 15 މީހުންނާއެކު ދަތުރުކުރަމުން ދަނިކޮށެވެ. މި ނުރައްކާތެރި ހާދިސާގައި ލިބުނު އަނިޔާތަކަށް ފަސް މީހަކަށް ހޮސްޕިޓަލުގައި ފަރުވާދީފައިވާކަމަށް ފުލުހުން މައުލޫމާތު ދެއެވެ. އޭގެ ތެރޭގައި ހިމެނެނީ ދެ ދިވެހިންނާއި ތިން ބިދޭސީންނެވެ.
މި ހާދިސާއާ ގުޅިގެން އެމްއެންޑީއެފުން ބުނީ، ދޯނި އަޑިއަށް ދިއުމުގެ ސަބަބުން ދޯނީގެ ބައިތަކާއި އޭގައި ހުރި ބައެއް ތަކެތި ދޫނިދޫގެ ހުޅަނގު އުތުރުން 0.38 ނޯޓިކަލް މޭލުން ފެށިގެން ދެކުނަށް އޮޔާ ދާކަމަށެވެ. އެހެންކަމުން، އެ ސަރަހައްދުން ދަތުރުކުރާ އުޅަނދުފަހަރުން އެކަމަށް ޚާއްސަ ސަމާލުކަމެއް ދިނުމަށް އެ އިދާރާއިން ވަނީ އެދިފައެވެ. ވަކިން ޚާއްސަކޮށް، ރޭގަނޑުގެ ވަގުތުތަކުގައި އެ ސަރަހައްދުން ދަތުރުކުރާނަމަ އިތުރަށް ސަމާލުވުމަށް ކަމާބެހޭ ފަރާތްތަކުން ވަނީ އިރުޝާދު ދީފައެވެ.
ކޮމެންޓު ފޮނުވާ