ރަމަޟާން މަހަށް ދޭ މަސްދަޅު ކޭސް ބަހަން ފަށައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުފުޅާ އެއްގޮތަށް، ކުރިއަށް އޮތް ބަރަކާތްތެރި ރަމަޟާން މަހަށް ޚާއްސަކޮށްގެން ސަރުކާރުން ގޭބީސީތަކަށް ހަދިޔާކުރާ މަސްދަޅު ކޭސް ދޫކުރުމުގެ މަސައްކަތް ރަސްމީކޮށް ފަށައިފިއެވެ. މާލެ ސަރަހައްދުގައި އެންމެ ފުރަތަމަ ފަށާފައިވާ މި މަސައްކަތަކީ ސަރުކާރަށް އެއް އަހަރު ފުރުމުގެ މުނާސަބަތުގައި ބޭއްވި ރަސްމިއްޔާތުގައި، ރައްޔިތުންނަށް ލުއިފަސޭހަ ކޮށްދިނުމުގެ ގޮތުން ކޮންމެ ގޭބީސީއަކަށް މަސްދަޅު ކޭހެއް ހަދިޔާކުރެއްވުމަށް ރައީސް ނިންމަވައި އިއުލާންކުރެއްވި މުހިންމު ނިންމެވުމެކެވެ.

މި ޕްރޮގްރާމްގެ ދަށުން ކޮންމެ ގޭބީސީއަކަށް 48 ދަޅުގެ މަސްދަޅު ކޭހެއް ހިލޭ ލިބިގެންދާނެއެވެ. މަސްދަޅު ކޭސް ދޫކުރުމުގެ ކަންކަން ކުރިއަށް ގެންދިއުމަށް ހަމަޖެހިފައިވަނީ ކޮންމެ ރެޔަކު 8:00 އިން ފެށިގެން 11:00 އަށެވެ. މާލެ ސަރަހައްދުގައި މިކަން އިންތިޒާމުކޮށްފައިވަނީ ރައްޔިތުންނަށް ވީހާވެސް ފަސޭހައިން ޚިދުމަތް ލިބޭނެހެން އެކި ސަރަހައްދުތަކަށް ބަހާލައިގެންނެވެ. އެގޮތުން މާލޭގައި ނަމަ މިފްކޯ މަރުކަޒު، ސޯޝަލް ސެންޓަރު، އެމްޓީސީސީ ސޯމިލު، ހެންވޭރު ބޯޅަދަނޑު އަދި ގަލޮޅު ދަނޑުން މަސްދަޅު ކޭސް ދޫކުރުމަށް ވަނީ ހަމަޖެހިފައެވެ.

ހުޅުމާލޭގައި ދިރިއުޅޭ ރައްޔިތުންނަށްވެސް ފަސޭހަކަމާއެކު މަސްދަޅު ކޭސް ލިބޭނެ އިންތިޒާމުތައް ވަނީ ހަމަޖައްސާފައެވެ. ހުޅުމާލެ ފޭސް 1 ގައި ޢުމަރު ޒާހިރު ބިލްޑިންގ، ޕޮލްކޯ ޓަވަރ އަދި މުޙައްމަދު ޤާސިމް ޕްރީސްކޫލުން ދޫކުރާއިރު، ފޭސް 2 ގައި ކާމިލު ދީދީ ސްކޫލް، ހިޔާ ޓަވަރު 10 އަދި އެމްޕީއެލް ޓަވަރު ޕީ އިން ޚިދުމަތް ލިބޭނެއެވެ. މީގެ އިތުރުން ވިލިމާލޭގައި ދިރިއުޅޭ ފަރާތްތަކަށް ވެމްކޯ ސައިޓުން މަސްދަޅު ކޭސް ނެގޭނެ އިންތިޒާމު ވަނީ ހަމަޖައްސާފައެވެ.

ކަލަންޑަރުގައިވާ ގޮތުން މިއަހަރުގެ ރޯދަ މަހުގެ ފުރަތަމަ ދުވަހަކީ އަންނަ ފެބްރުއަރީ މަހުގެ 18 ވަނަ ދުވަހަށް ވާއިރު، ރޯދަ މަސް ފެށުމުގެ ކުރިން ރާއްޖޭގެ ހުރިހާ ގޭބީސީއަކަށް މަސްދަޅު ފޯރުކޮށްދިނުމަކީ ސަރުކާރުގެ އަމާޒެވެ. މި ބޮޑު މަޝްރޫޢުގެ ދަށުން ޖުމްލަ 118,673 މަސްދަޅު ކޭސް ބަހައި ނިންމާނެކަމަށް ސަރުކާރުން ވަނީ ހާމަކޮށްފައެވެ.