ދުންފަތް ކޮންޓްރޯލް ކުރުމުގެ ގާނޫނުގެ ދަށުން، ދުންފަތުގެ ވިޔަފާރި ކުރުމަށް ނަގަންޖެހޭ "ވެންޑާ ލައިސަންސް" މިހާތަނަށް 437 ފަރާތަކަށް ދޫކޮށްފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެ އެޖެންސީން މަޢުލޫމާތު ދިން ގޮތުގައި، ވިޔަފާރި ކުރުމުގެ ލައިސަންސްގެ އިތުރުން ޓޮބޭކޯ އިމްޕޯޓް ކުރުމަށް 31 ފަރާތަކަށް އަދި ރީ-އެކްސްޕޯޓް ކުރުމަށް 2 ފަރާތަކަށް ވަނީ ހުއްދަ ދީފައެވެ. ދުންފަތުގެ ވިޔަފާރީގައި މައިގަނޑު ގޮތެއްގައި ދޫކުރަނީ ގަނޑުކޮށް ނުވަތަ ވަކިން ވިއްކުމާއި، އިމްޕޯޓް ކުރުމާއި، އައު ބާވަތްތައް ރެޖިސްޓްރީ ކުރުމުގެ އިތުރުން ރީ-އެކްސްޕޯޓް ކުރުމުގެ ލައިސަންސެވެ.
މި ސަރުކާރުން ދަނީ ދުންފަތުގެ އިސްތިއުމާލުކުރުން މަދުކުރުމަށް ހަރުކަށި ފިޔަވަޅުތަކެއް އަޅަމުންނެވެ. އޭގެ ތެރޭގައި ރާއްޖޭގައި ވޭޕް މަނާކުރުމާއި، ސިނގިރޭޓުން ނަގާ ޑިއުޓީ ބޮޑުކުރުމުގެ އިތުރުން، 2007 ވަނަ އަހަރުގެ ފަހުން އުފަންވާ ކުދިންނަށް ދުންފަތް މަނާކުރުމުގެ "ޖެނެރޭޝަނަލް ބޭން" އެއް ގެނައުން ހިމެނެއެވެ. މީގެއިތުރުން، ދުންފަތުގެ އިސްތިއުމާލުކުރުން އެއްކޮށް ހުއްޓާލާ ރަށްރަށުގެ ރައްޔިތުންނަށް ފައިސާގެ އިނާމު ދިނުމަށްވެސް ރައީސުލްޖުމްހޫރިއްޔާ ވަނީ ނިންމަވާފައެވެ.
މިފަދަ ފިޔަވަޅުތައް އަޅަމުންދިޔަ ނަމަވެސް، އާންމު ތަންތަނުގައި ދުންބުއިމާއި ވަކި ސިނގިރޭޓް ވިއްކުން ފަދަ ގާނޫނުން މަނާ ކަންކަން އަދިވެސް ހުއްޓުވިފައިނުވާކަން ފާހަގަކުރެވެއެވެ. ގަވާއިދުތައް ހުރި ނަމަވެސް، އެކަންކަން ތަންފީޒުވުން ކުޑަވުމުގެ ސަބަބުން މަގުމަތީގައި އުޅޭއިރު ދުންފަތުގެ ދުމުގެ ނުރައްކަލުން އާންމުން ސަލާމަތްކުރުމަށް ވަނީ ގޮންޖެހުންތަކާ ކުރިމަތިވެފައެވެ.
ކޮމެންޓު ފޮނުވާ