ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް އެމްޑީޕީން ބާއްވާ ޕްރައިމަރީގައި ވޯޓުލުމަށްޓަކައި، މާލެއާއި އަތޮޅުތެރެ ހިމެނޭހެން ޖުމްލަ 65 ވޯޓު ފޮށި ބަހައްޓާނެ ތަންތަން އެ ޕާޓީން ރަސްމީކޮށް އިއުލާންކޮށްފިއެވެ. މި އިންތިޚާބުގެ ވޯޓުލުން ކުރިއަށް ގެންދިއުމަށް ހަމަޖެހިފައިވަނީ މި ހިނގާ ޖެނުއަރީ މަހުގެ 16 ވާ ހުކުރު ދުވަހުގެ މެންދުރުފަހު 2:30 އިން ފެށިގެން ރޭގަނޑު 8:00 ގެ ނިޔަލަށެވެ.
ވޯޓު ފޮށިތައް ބެހެއްޓުމަށް ހަމަޖެހިފައިވާ އިންތިޒާމުތަކަށް ބަލާއިރު، މާލޭގެ ދާއިރާތަކަށް ޚާއްސަކޮށްގެން މާލޭގައި 17 ވޯޓު ފޮށި ބަހައްޓާއިރު، މާލޭގައި ދިރިއުޅޭ އަތޮޅުތަކުގެ ރައްޔިތުންނަށް ޚާއްސަކޮށްގެން 14 ފޮއްޓެއް ބެހެއްޓުމަށް ވަނީ ނިންމާފައެވެ. މީގެ އިތުރުން މާލެއިން ބޭރުގައި، އަތޮޅުތަކުގެ އެކި ރަށްރަށުގައި 34 ވޯޓު ފޮށި ބެހެއްޓުމަށް ވަނީ ހަމަޖެހިފައެވެ. މާލޭގައި ދިރިއުޅޭ އަތޮޅުތަކުގެ ރައްޔިތުން ވޯޓުލުމަށް ހަމަޖެހިފައިވާ 14 ފޮށިވެސް ބެހެއްޓުމަށް ހަމަޖެހިފައިވަނީ ކަލާފާނު ސްކޫލްގައެވެ.
މާލޭގެ ރައްޔިތުންނަށް ޚާއްސަކޮށްގެން މާލޭގެ އެކި ސަރަހައްދުތަކުގައި ފޮށިތައް ބަހައްޓާއިރު، އެންމެ ގިނަ ފޮށި ބެހެއްޓުމަށް ހަމަޖެހިފައިވަނީ މަޖީދިއްޔާ ސްކޫލާއި ހިރިޔާ ސްކޫލްގައެވެ. އެއިން ކޮންމެ ސްކޫލެއްގައި 4 ފޮށި ބަހައްޓާނެއެވެ. މީގެ އިތުރުން އިސްކަންދަރު ސްކޫލްގައި 3 ފޮށި، ގަލޮޅު މަދަރުސާއާއި ގާޒީ ސްކޫލްގައި 2 ފޮށި، އަދި މުހިއްޔުއްދީން ސްކޫލާއި ކާމިލް ދީދީ ސްކޫލްގައި 1 ވޯޓު ފޮށި ބެހެއްޓުމަށް ވަނީ ހަމަޖެހިފައެވެ.
އަތޮޅުތެރޭގެ ވޯޓުލުމުގެ އިންތިޒާމުތަކަށް ބަލާއިރު، އެންމެ ގިނަ އަދަދެއްގެ ވޯޓު ފޮށި ބެހެއްޓުމަށް ހަމަޖެހިފައިވަނީ ގދ. އަތޮޅު ތައުލީމީ މަރުކަޒުގައެވެ. އެއީ ތިނަދޫ ދާއިރާތަކަށް ޚާއްސަ ފޮށިތަކެވެ. ބޮޑެތި އާބާދީތަކަށް ބަލާއިރު ލ. ގަމުގައި 3 ފޮށި، އައްޑޫ ސިޓީގައި 2 ފޮށި އަދި ހުޅުދޫގައި 1 ފޮށި ބަހައްޓާނެއެވެ. ހަމައެއާއެކު ފުވައްމުލައް ސިޓީގައި 1 ފޮށި ބަހައްޓާއިރު، ގއ. އަދި ގދ. އަތޮޅުގެ އެހެން ރަށްތަކުގައި 2 ފޮށި ބެހެއްޓުމަށް ވަނީ ނިންމާފައެވެ.
މި ފަހަރުގެ ޕްރައިމަރީގައި ވާދަކުރުމަށް ގިނަ އަދަދެއްގެ ކެންޑިޑޭޓުން ވަނީ ކުރިމަތިލާފައެވެ. އެގޮތުން ކައުންސިލް އިންތިޚާބުގައި އެމްޑީޕީގެ ޓިކެޓް ހޯދުމަށް 510 އަށްވުރެ ގިނަ ކެންޑިޑޭޓުން ވާދަކުރާއިރު، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް 190 އަށްވުރެ ގިނަ ކެންޑިޑޭޓުން ވަނީ ކުރިމަތިލާފައެވެ.
ކޮމެންޓު ފޮނުވާ