ހުޅުމާލެ ތަރައްޤީކުރުމުގެ މަޝްރޫޢުގެ ދަށުން، ފޭސް ތިނެއްގެ ބިން ހިއްކުމުގެ މަސައްކަތް ހަލުވިކަމާއެކު ކުރިއަށްދާ ކަމަށާއި، މިހާތަނަށް އެ ސަރަހައްދުން 55 ހެކްޓަރުގެ ބިން ހިއްކައި ނިމިފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހާމަކޮށްފިއެވެ.
އެ ކުންފުނިން މަޢުލޫމާތު ދީފައިވާ ގޮތުގައި، މި މަޝްރޫޢުގެ މަސައްކަތްތައް ކުރިއަށްދަނީ ކުރިންވެސް ކަނޑައަޅާފައިވާ ތާވަލާ އެއްގޮތަށް ވަރަށް ބާރަށެވެ. ފޭސް ތިނަކުން ޖުމްލަ 63 ހެކްޓަރުގެ ބިން ހިއްކުމަށް ހަމަޖެހިފައިވާއިރު، މިހާރު ހިއްކިފައިވާ 55 ހެކްޓަރާއެކު މަޝްރޫޢުގެ ބޮޑު ބައެއް މިވަނީ ނިމުމަކާ ގާތްވެފައެވެ.
މި ސަރަހައްދުގެ ބިން ހިއްކުމުގެ މަސައްކަތް ވަކި ހިސާބަކުން މެދުކެނޑިފައި އޮތުމަށްފަހު، އަލުން މަސައްކަތް ފަށާފައިވަނީ ނިމިދިޔަ ނޮވެމްބަރު މަހުގެ 10 ވަނަ ދުވަހުއެވެ. މަސައްކަތް އަލުން ފެށުމާއެކު، ބިން ހިއްކުމުގެ ދުވެލި އަވަސްކުރުމަށްޓަކައި ސަރުކާރުން ވަނީ ޚާއްޞަ ފިޔަވަޅުތަކެއް އަޅާފައެވެ. އެގޮތުން، މި ދާއިރާގައި ދުނިޔޭގެ އެންމެ ނަން މަޝްހޫރު އެއް ކުންފުނި ކަމަށްވާ ނެދަލޭންޑްސްގެ ބޮސްކާލިސް ކުންފުނީގެ 22,000 ކިއުބިކް މީޓަރުގެ ޑްރެޖަރެއް ގެނެސް، މަސައްކަތް ވަނީ އިތުރަށް ފުޅާކޮށްފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވާ ގޮތުގައި، ފޭސް 3 ގެ ބިން ހިއްކުމުގެ މަސައްކަތް މި ހިނގާ މަސް ނިމުމުގެ ކުރިން އެއްކޮށް ނިންމާލެވޭނެއެވެ. އެހެންކަމުން، ބާކީ އޮތް ބައި ހިއްކުމުގެ މަސައްކަތް ނިންމުމަށްޓަކައި މިހާރު މަސައްކަތް ކުރަމުންދަނީ ވަރަށް ބާރު ސްޕީޑެއްގައެވެ.
ކޮމެންޓު ފޮނުވާ