ހުއްދަ ނެތި ބޭރުގެ ކޯސްތައް ހިންގުމުން އެވިޑް ކޮލެޖަށް ފިޔަވަޅު އަޅައިފި

ހުއްދަ ނެތި ބޭރުގެ ކޮލެޖްތަކުގެ ކޯސްތައް ތަކުރާރުކޮށް ހިންގަމުންދާތީ މޯލްޑިވްސް ކޮލިފިކޭޝަން އޮތޯރިޓީން އެވިޑް ކޮލެޖަށް ފިޔަވަޅު އަޅައިފިއެވެ.

އެމްކިއުއޭގެ ޗީފް އެގްޒެކްޓިވް މަރްޔަމް ފިޒާނާ ރަޝީދު ސޮއިކުރައްވާ ނެރުއްވި ބަޔާނެއްގައި ބުނީ، ސްރީ ލަންކާގެ އެމަޒޯން ކޮލެޖާއި އަލްޒެޓް ޔުނިވާސިޓީގެ ކޯސްތައް ގަވާއިދާ ހިލާފަށް ހިންގާފައިވާ ކަމަށެވެ. މީގެ އިތުރުން ލަންކާގައި ރަޖިސްޓްރީ ވެސް ނުކުރާ ފަސް މަރުކަޒެއްގެ ކޯސްތައް ހިންގަން އިޝްތިހާރުކޮށްފައިވާ ކަމަށް ބަޔާނުގައިވެ އެވެ. އޭގެ ތެރޭގައި ހިމެނެނީ ޗެސްޓާ ކޮލެޖު އޮފް ހަޔާ އެޑިޔުކޭޝަން، އިމްޕީރިއަލް ވިސްޑަމް ގްރެޖުއޭޓް ކެމްޕަސް، އިނޮވޭޓަސް ކެމްޕަސް، ސިލޯން ކޮލެޖު އޮފް އެޕްލައިޑް ސްޓަޑީޒް އަދި ބިޓްވިން ކެމްޕަސް އެވެ.

އެމްކިއުއޭއިން ބުނީ، އޮގަސްޓު 2024 އިން ފެށިގެން ގަވައިދާ ހިލާފަށް ޕްރޮގްރާމް ނުހިންގުމަށް އެވިޑް ކޮލެޖަށް ތަކުރާރުކޮށް އަންގައި ނަސޭހަތްތެރިވެފައިވާ ނަމަވެސް އެކަން ކުރިއަށްދާ ކަމަށެވެ. މި މައްސަލައިގައި އެވިޑް ކޮލެޖަށް ކުރިން ވެސް ފިޔަވަޅު އަޅާފައިވާއިރު، މިއީ މިދިޔަ ސެޕްޓެމްބަރުގައި ގެޒެޓްކުރި އެކްރެޑިޓޭޝަން ގަވައިދުގެ ދަށުން އަޅާ ފުރަތަމަ ފިޔަވަޅެވެ. އެމްކިއުއޭއިން ހުރިހާ ތައުލީމީ މަރުކަޒުތަކަށް ވެސް ބޭރުގެ ޕްރޮގްރާމްތައް ހިންގުމުގެ ކުރިން ހުއްދަ ހޯދުމަށް ފެބްރުއަރީ 2025 ގައި އިލްތިމާސްކޮށްފައިވެ އެވެ.