ކުރީގެ ރައީސް މުހައްމަދު ނަޝީދާ އަވަހަށް ބައްދަލުކުރައްވައި ސިޔާސީ މަސައްކަތް އެކުގައި ކުރައްވަން ފަށްޓަވާނެ ކަމަށް ކުރީގެ ރައީސް އިބްރާހީމް މުހައްމަދު ސޯލިހް ވިދާޅުވެއްޖެ އެވެ. ދ. ކުޑަހުވަދޫގައި މިއަދު އެމްޑީޕީގެ މެންބަރުންނާ ބައްދަލުކުރެއްވުމުގައި ރައީސް ސޯލިހް ވިދާޅުވީ، ދަތުރުފުޅު ނިންމަވާލައްވައި މާލެ ވަޑައިގެން ނަޝީދާ ބައްދަލުކުރައްވާނެ ކަމަށާއި އަންނަ އަހަރުގެ ލޯކަލް ކައުންސިލް އިންތިހާބު ކާމިޔާބުކުރަން ދެ ބޭފުޅުން ގުޅިގެން މަސައްކަތްކުރައްވާނެ ކަމަށެވެ. މިހާރު ވެސް މަޝްވަރާކުރައްވަމުން ގެންދަވާ ކަމަށް އެ މަނިކުފާނު ވިދާޅުވިއެވެ.
ނަޝީދު އެމްޑީޕީން ވަކިވެވަޑައިގަތީ 2023 ގެ ރިޔާސީ ޕްރައިމަރީގައި ރައީސް ސޯލިހާ ވާދަކުރައްވައި ނާކާމިޔާބުވެވަޑައިގަތުމާއި ހިޔާލުތަފާތުވުންތަކާ ގުޅިގެންނެވެ. އޭގެފަހު ދަ ޑިމޮކްރެޓްސްގެ ނަމުގައި އެމަނިކުފާނު ވަނީ އާ ޕާޓީއެއް އުފައްދަވާފައެވެ. އެކަމަކު މި އަހަރުގެ ޖޫން މަހު ރައީސް ނަޝީދު އަލުން އެމްޑީޕީއާ ގުޅިވަޑައިގަތެވެ. ޕާޓީއާ އަލުން ގުޅިވަޑައިގަތުމުން ބޭއްވި ޖަލްސާގައި އެ މަނިކުފާނު ވިދާޅުވީ ކައުންސިލް އިންތިހާބުގައި ވެރިކަން ކުރާ ޕީއެންސީއަށް ލިބޭނީ 20 އިންސައްތަ ކަމަށެވެ.
އެމްޑީޕީގެ ތެރޭގައި މިހާރު ވެސް ރިޔާސީ އިންތިހާބުގެ ވާދަވެރިކަން ބޮޑުވެފައިވާއިރު، ރައީސް ސޯލިހާއި ކުރީގެ ޗެއާޕާސަން ފައްޔާޒް އިސްމާއީލް ވެސް ރިޔާސީ ރޭހަށް ނުކުންނެވުމުގެ ޝައުގުވެރިކަން ފާޅުކުރައްވާފައިވެއެވެ. ޕާޓީގެ ރައީސް އަބްދުﷲ ޝާހިދު ވެސް އެކަމަށް ޝައުގުވެރިވެވަޑައިގަންނަވާ ކަމަށް މައުލޫމާތު ލިބެއެވެ. މީގެއިތުރުން މާލޭ މޭޔަރުކަމަށް ވާދަކުރައްވާ އަލީ އާޒިމާއި މިހާރުގެ މޭޔަރު އާދަމް އާޒިމްގެ ވާދަވެރިކަން ވެސް ބޮޑުވެފައިވެއެވެ.
ކޮމެންޓު ފޮނުވާ