ހުޅުމާލޭ ފޭސް 1 އާއި ފޭސް 2 ން ދޫކޮށްފައިވާ ގޯތިތަކުގައި 10 ބުރިއަށް އިމާރާތް ކުރުމުގެ ހުއްދަ ދެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފިއެވެ. މިރޭ ހުޅުމާލޭ ފުރަތަމަ ފިޔަވަހީގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވަނީ މިގޮތަށް އިއުލާންކުރައްވާފައެވެ. މިހާރު ހުޅުމާލެއަކީ އެންމެ މަތިވެގެން 8 ބުރިއަށް އިމާރާތް ކުރެވޭ ސަރަހައްދެކެވެ.
ރައީސް ވިދާޅުވީ ގޯތިތަކުގެ އިމާރާތުގެ އުސްމިނަކީ ސަރަހައްދުގެ ޕްލޭނާ ގުޅިފައިވާ ކަމެއް ކަމަށާއި، ތަން އާބާދުވާ ވަރަކަށް ލޭންޑު ޔޫސް ޕްލޭނަށް އަންނަ ބަދަލަކާ އެއްގޮތަށް އިންފްރާސްޓްރަކްޗާވެސް ބަދަލުކުރަން ޖެހޭ ކަމަށެވެ. އެހެންވެ އެމަނިކުފާނު ވައުދުވެވަޑައިގެންނެވި ގޮތަށް ހުޅުމާލޭގެ ދެ ފޭސްގެ ގޯތިތަކުގައި 10 ބުރިއަށް އިމާރާތްކުރުމުގެ ހުއްދަދެއްވުމަށް ނިންމަވާފައިވާ ކަމަށް ވިދާޅުވިއެވެ.
ނަމަވެސް މި ހުއްދަ ދެއްވާނީ ބައެއް ޝަރުތުތަކާއެކުގައެވެ. އެގޮތުން އިމާރާތުގެ އެންމެ ތިރީ ފްލޯއަކީ ވެހިކަލް ޕާކު ކުރުމަށް ހާއްސަކޮށްފައިވާ ފްލޯއަކަށް ހަދަން ޖެހޭނެއެވެ. އަދި ފުރަތަމަ ފްލޯ ބޭނުންކުރަން ޖެހޭނީ ވިޔަފާރިއަކަށް ނުވަތަ އާމްދަނީ ހޯދޭނެ އެހެން ބޭނުމަކަށް ކަމަށް ރައީސް ވަނީ ވިދާޅުވެފައެވެ.
މީގެ އިތުރުން ފޭސް 1 ން ފައިސާ ދައްކައިގެން ބިން މިލްކުކުރެވޭ ގޮތަށް ދޫކޮށްފައިވާ ގޯތިތަކަށް މިހާތަނަށް އެއްވެސް މާލީ ލުޔެއް ދީފައި ނުވާތީ އެ ގޯތިތައް ލިބިފައިވާ މީހުންގެ އެގްރީމަންޓުގެ ޖުމްލަ އަގުން 10 ޕަސެންޓުގެ ޑިސްކައުންޓެއް ދެއްވަން ވަނީ ނިންމަވާފައެވެ. މީގެކުރީން ފޭސް 2 ގައި ހަދާފައިވާ 4000 ފްލެޓްގެ ކުއްލި އަދި ޑިޕޮސިޓް ވަނީ ކުޑަކޮށްދީފައެވެ.
ކޮމެންޓު ފޮނުވާ