ހުޅުމާލޭގައި ގަވާއިދާ ހިލާފަށް ޕާކު ކޮށްފައި ހުރި އުޅަނދުތައް ޓޯކުރަމުންދާއިރު، މި އުޅަނދުތައް އަނބުރާ ހޯދުމަށް ވެރިންނަށް 60 ދުވަހުގެ މުއްދަތެއް ދޭނެ ކަމަށް ފުލުހުން ބުނެފިއެވެ. އެ މުއްދަތުގައި އުޅަނދު ނުގެންދާނަމަ ގާނޫނީ އިޖުރާއަތުގެ ދަށުން ނައްތާލުމުގެ މަސައްކަތް ކުރާނެ ކަމަށް ވެސް ފުލުހުން ވަނީ ހާމަކޮށްފައެވެ.
މި މަހުގެ 6 ވަނަ ދުވަހު ފަށާފައިވާ މި ޓޯއިން އޮޕަރޭޝަނުގައި ހުސްބިންތަކުގައާއި މަގުތަކުގައި ގަވާއިދާ ހިލާފަށް ޕާކުކޮށްފައި ހުރި އުޅަނދުތަކާއި ރަޖިސްޓްރީ ނުކޮށް ބަހައްޓާފައިވާ އުޅަނދުތައް ނަގަމުން ގެންދަނީ މި މަހުގެ ތާރީޚް 1 ގައި ގެޒެޓް ކުރި ހާއްސަ އިއުލާނާ އެއްގޮތަށެވެ.
ފުލުހުން ބުނި ގޮތުގައި އުޅަނދު އަނބުރާ ހޯދުމަށް ވެރިފަރާތުން ހުރިހާ ޖޫރިމަނާއެއް ދެއްކުމަށްފަހު ހުޅުމާލެ ފޭސް 1 ފުލުހުންގެ ސްޓޭޝަނުން ލިބޭ ސްލިޕާއެކު ތިލަފުށަށް ދިއުމުން އުޅަނދު ދޫކުރާނެއެވެ. އުޅަނދު ގެންދާނީ ރަޖިސްޓްރީ ކުރެވިފައިވާ ޒޯނަށް ކަން ކަށަވަރުކުރާނެ ކަމަށް ވެސް ފުލުހުން ހާމަކުރެއެވެ. ޓޯކުރާ އުޅަނދުތައް 7 ދުވަހަށްފަހު އާންމުކޮށް އިއުލާންކޮށް، އެއަށްފަހު 60 ދުވަހުގެ މުއްދަތު ދިނުމަށްފަހު ވެސް ނުގެންދާ އުޅަނދުތައް ނައްތާލާނެއެވެ.
ކޮމެންޓު ފޮނުވާ