ހައިކޯޓުގެ ފަނޑިޔާރު މުހައްމަދު ނިޔާޒް މިއަދު ޝަރަފުވެރިކަމާއެކު ފަނޑިޔާރުކަމުގެ މަގާމުން ވަކިވެވަޑައިގެންފިއެވެ.
ހައިކޯޓުގެ ރަސްމީ އެކްސް އެކައުންޓުން ކުރި ޕޯސްޓެއްގައި ނިޔާޒް ވަކިވެވަޑައިގެންނެވި ކަން ހާމަކުރައްވާ، އެބޭފުޅާ ކޮށްދެއްވި އަގުހުރި ހިދުމަތްތަކަށް ޝުކުރު ދަންނަވާފައިވެއެވެ.
ނިޔާޒް ހައިކޯޓުގެ ފަނޑިޔާރުކަމުގެ ހުވާކުރެއްވީ 2018 ވަނަ އަހަރުގެ ޖެނުއަރީ 25 ވަނަ ދުވަހުއެވެ. އޭގެ ކުރިން މިނިސްޓްރީ އޮފް ޖަސްޓިސްގެ ލީގަލް އެސިސްޓެންޓްކަމާއި، ހދ. ޖުޑީޝަލް ދާއިރާގެ އިސް މެޖިސްޓްރޭޓްކަމާއި، ހދ. ވައިކަރަދޫ ކޯޓުގެ މެޖިސްޓްރޭޓްކަން އަދާކުރެއްވިއެވެ. މީގެ އިތުރުން މިދިޔަ އަހަރުގެ މާޗު 20 އިން އޮކްޓޫބަރު 22 އާ ހަމައަށް ޖުޑީޝަލް ސާވިސް ކޮމިޝަން (ޖޭއެސްސީ) ގެ ނާއިބު ރައީސްކަންވެސް ފުރުއްވައިފައިވެއެވެ.
ނިޔާޒަކީ މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީއިން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލުކުރައްވައިގެން ހުންނެވި ބޭފުޅެކެވެ.
ކޮމެންޓު ފޮނުވާ