މާލެ ސަރަހައްދުގައި ރަޖިސްޓްރީކޮށްފައިވާ އުޅަނދުތަކަށް ހާއްސަ ވަގުތީ ޕާކިންގ ސަރަހައްދެއް ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން ހުޅުވައިދެއްވައިފިއެވެ. ހުޅުމާލެ ފޭސް 2 ގައި ހުންނަ އޮޅުހިޔާއާއި ޖެހިގެން އޮންނަ ހުސްޖާގައިގަ ޓްރާންސްޕޯޓު މިނިސްޓްރީއާއި އެޗްޑީސީން ގުޅިގެން ތަރައްގީކޮށްފައިވާ މި ޕާކިންގ އަކީ 1200 އަށްވުރެ ގިނަ ވެހިކަލް ޕާކު ކުރެވޭނެ ތަނެކެވެ.
ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ވަޒީރު އަމީން ވިދާޅުވީ ޕާކު ކުރާނެ ތަނެއް ނެތިގެން މަގުތަކާއި އާންމު ތަންތަނުގައި އުނދަގޫވާ ގޮތަށް ވެހިކަލްތައް ޕާކުކޮށްފައި ހުންނަ މައްސަލައަށް މި ޕާކިންގ ސަރަހައްދުގެ ސަބަބުން ކޮންމެވެސް ވަރެއްގެ ހައްލެއް ލިބިގެންދާނެ ކަމަށެވެ. މަގުތަކުގެ ތޮއްޖެހުން ކުޑަވެގެންދާނީ އާންމުން މި ފަދަ ސަރަހައްދުތަކުގައި ޕާކު ކުރުމުން ކަމަށް ވިދާޅުވެ މި ސަރަހައްދުގައި ޕާކު ކުރެވޭ އުޅަނދުތައް އެތަނުގައި ޕާކު ކުރުމަށް އަމީން އެދިވަޑައިގެންފައިވެއެވެ.
މި ޕާކިންގައި ހަމައެކަނި 4 ފުރޮޅުލީ އުޅަނދުތަކަށް ޕާކު ކުރެވޭނެއެވެ. މީގެކުރިން ހުޅުމާލޭގައި ތަރައްގީކޮށްފައިވާ ޕާކިންގ ސަރަހައްދުތަކާއިއެކު މިހާތަނަށް 2500 ވެހިކަލް ޕާކު ކުރެވޭނެ ޖާގަ ތަނަވަސްކޮށްދީފައިވާ ކަމަށް މިނިސްޓްރީން ބުނެއެވެ. އުމުރު ހަމަވެފައިވާ ވެހިކަލްތައް މާލެ ސަރަހައްދުގެ ބަދަލުގައި އެހެން ސަރަހައްދެއްގައި ރެޖިސްޓްރީކުރުމަށް އިރުޝާދު ދެއްވައި އެކަމަށް އެއް އަހަރުގެ މުއްދަތެއް ދީފައިވާނެ ކަމަށްވެސް ވަޒީރު ވަނީ ވިދާޅުވެފައެވެ.
މި މަސައްކަތްތަކުގެ ނަތީޖާއެއްގެ ގޮތުން 2023 ވަނަ އަހަރާއި އަޅާބަލާއިރު އާ ވެހިކަލް ރެޖިސްޓްރީކުރާ އަދަދު 74 އިންސައްތަ ދަށްވެފައިވާކަމަށް ވަޒީރު އަމީން ވިދާޅުވިއެވެ. މިއީ މާލެ ސަރަހައްދުގެ މަގުތަކުގައި ވެހިކަލްތަކުގެ ތޮއްޖެހުން ކުޑަކުރުމުގެ މަސައްކަތަށް ލިބުނު ބޮޑު ކުރިއެރުމެއް ކަމަށް ވަޒީރު ފާހަގަކުރެއްވިއެވެ.
ކޮމެންޓު ފޮނުވާ