ރާއްޖެއަށް ކާބޯތަކެތި އެތެރެކުރުމަށް ބޭނުންވާ ހެލްތު ސެޓްފިކެޓާ ނުލައި، ކަނޑުމަގުންނާއި ވައިގެ މަގުން ޝިޕްމަންޓުތަކެއް އެތެރެކުރަން ކްލިއަރެންސް ދިން މައްސަލައިގައި މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގެ ޕޯޓް ކްލިއަރެންސް ސެކްޝަންގައި މަސައްކަތްކުރާ ދެ އޮފިސަރެއްގެ މައްޗަށް ދައުވާކޮށްދިނުމަށް އެދި ޕީޖީ އޮފީހުން މިއަދު ކްރިމިނަލް ކޯޓަށް ހުށަހަޅައިފި އެވެ.
މިދިޔަ މާޗު މަހު ހިނގި މި މައްސަލައިގައި ދައުވާ އުފުލާފައިވަނީ އަހްމަދު ހާޝިމް (ދަފްތަރު ރސ 9244) އާއި ގދ. ތިނަދޫ އަރަފާތު، އަހްމަދު ޒާހިރުގެ މައްޗަށެވެ. މި ދެ މީހުންގެ މައްޗަށް ވެސް ކުރަނީ ގާނޫނުލްއުގޫބާތުގެ 512 ވަނަ މާއްދާގެ (ހ)ގެ ދަށުން، ރަސްމީ ވާޖިބު އަދާކުރުމުގައި އެކަށީގެންނުވާ އަމަލެއް ހިންގުމުގެ ކުށުގެ ތިން ދައުވާ އެވެ. ކޮންމެ ދައުވާއެއް ސާބިތުވެއްޖެ ނަމަ 4 މަހާއި 24 ދުވަހުގެ ޖަލު ހުކުމެއް އަންނާނެ އެވެ.
ދައުވާ ލިބޭ ފަރާތްތަކުން ނަސޭހަތުގެ އެއްބަސްވުމެއް ހެދުމަށް އެދުނު ނަމަވެސް، މިއީ ރާއްޖޭގެ ކާބޯތަކެތީގެ ސަލާމަތާއި ރައްކާތެރިކަމާ ސީދާ ގުޅުންހުރި މައްސަލައެއް ކަމަށް ވާތީ، އާންމު މަސްލަހަތަށް ބެލުމަށްފަހު އެ އެއްބަސްވުން ނުހެދުމަށް ޕީޖީ އޮފީހުން ވަނީ ނިންމައިފަ އެވެ.
ކޮމެންޓު ފޮނުވާ