ކުރިއަށް އޮތް ރަމަޟާން މަހު އައްޑޫ ސިޓީގައި ކަރަންޓު މައްސަލަ ހައްލުކުރުމަށް ކަރަންޓު ކެޕޭސިޓީ 17 މެގަވޮޓަށް އިތުރުކުރުމުގެ މަސައްކަތް ކުރަމުންދާކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ނަޖާހް ވިދާޅުވެއްޖެއެވެ.
ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސް ކޮމެޓީގައި ވާހަކަދައްކަވަމުން ނަޖާހް ފާހަގަކުރެއްވީ އައްޑޫގެ ކަރަންޓު މައްސަލައަކީ މި ސަރުކާރު އައުމުގެ ކުރިންވެސް ދިމާވެގެން އައި މައްސަލައެއް ކަމަށާއި، ކުރީގެ ސަރުކާރުން މިކަން ހައްލުކުރުމަށް ފުރިހަމަ މަސައްކަތެއް ކޮށްފައި ނުވާކަމަށެވެ. 2019 އިން 2023 އަށް 14 ޖަނަރޭޓަރު އައްޑޫއަށް ގެންގޮސްފައިވިނަމަވެސް، އެތެރެއިން 2 ޖަނަރޭޓަރު ފިޔަވައި ހުރިހައި ޖަނަރޭޓަރުތައް ހަލާކުވެފައިވާކަން ފާހަގަކުރައްވަމުން އޭނާ ވިދާޅުވީ އެ ޖަނަރޭޓަރުތައް ރަނގަޅުކުރުމަށް މި ސަރުކާރުން 16 މިލިޔަން ރުފިޔާ ހަރަދުކޮށްފައިވާކަމަށެވެ.
ނަޖާހް ހާމަކުރެއްވި ގޮތުގައި، ރަމަޟާން މަހަށް އިތުރު 1.8 މެގަވޮޓް ޖަނަރޭޓަރެއް އައްޑޫއަށް ގެންދިއުމާއިއެކު، ހަލާކުވެފައި ހުރި ޖަނަރޭޓަރުތަކުގެ ތެރެއިން މަރާމާތުކުރެވޭ ހުރިހައި ޖަނަރޭޓަރުތައް ހެދުމުގެ މަސައްކަތް ކުރިއަށްދާއިރު، ބޭނުންވާ ސްޕެއާ ޕާޓްސް މަހެއްހާ ދުވަހުގެ ތެރޭގައި ލިބިގެންދާނެކަމަށް އޭނާ ލަފާކުރެއްވިއެވެ. މި މަސައްކަތްތަކާއިއެކު ސިސްޓަމްގެ ކެޕޭސިޓީ 16 ނުވަތަ 17 މެގަވޮޓަށް އިތުރުކުރެވޭނެކަމަށް އޭނާ ވިދާޅުވިއެވެ. މި ސަރުކާރުން 8 ޖަނަރޭޓަރު ގެންގޮސް ކަރަންޓު ކެޕޭސިޓީ 12 މެގަވޮޓަށް އިތުރުކޮށްފައިވާއިރު، މިހާރު އައްޑޫގައި ލޯޑު ބޮޑުވާއިރު 13 މެގަވޮޓަށް އަރާކަން ފާހަގަކުރައްވަމުން ނަޖާހް ވިދާޅުވީ ރަމަޟާން މަހަށް ގެންނަ އިތުރު ޖަނަރޭޓަރާއިއެކު ލޯޑު ފުރިހަމައަށް ހިފެހެއްޓޭނެކަމަށެވެ.
ކޮމެންޓު ފޮނުވާ