ހއ އިން މ އަށް ހުދު ސަމާލު، ބޯކޮށް ވާރޭ ވެހޭނެ

މޫސުން ގޯސްވާނެ ކަމަށް ލަފާކޮށް މެޓް އޮފީހުން އިއްޔެ މެންދުރު ރާއްޖޭގެ ބޮޑު ސަރަހައްދަކަށް ހުދު ސަމާލު ނެރެފިއެވެ. ހއ އަތޮޅުން ފެށިގެން މ އަތޮޅަށް ނެރެފައިވާ ސަމާލު އޮންނާނީ މިއަދު ހެނދުނު 5:45 އިން 11:00 އަށެވެ.

މެޓް އޮފީހުން ބުނީ އެ ސަރަހައްދަށް ބޯކޮށް ވާރޭވެހި ގުގުރާނެ ކަމަށާ، ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށެވެ. މިއަދުގެ މޫސުމުގައި ރާއްޖޭގެ އެކި ހިސާބަށް ވިއްސާރަކުރުމާއެކު ގުގުރާނެ ކަމަށާ، ބޮޑަށް މެދުރާއްޖެތެރެއާއި އުތުރަށް ބޯކޮށް ވާރޭވެހޭނެ ކަމަށް ލަފާކޮށްފައިވެއެވެ.

އުތުރުގެ އަތޮޅުތަކަށް ހުޅަނގާއި ހުޅަނގުއުތުރުން ގަޑިއަކު 5-15 މޭލު ބާރުމިނުގައި ވައިޖެހޭނެ ކަމަށާ، އެހެން ސަރަހައްދުތަކަށް ހުޅަނގުދެކުނާއި ހުޅަނގުން 10-20 މޭލުގެ ބާރުމިނުގައި ވައި ޖެހޭނެ ކަމަށް މެޓް އޮފީހުން ބުނެއެވެ. ވިލާގަނޑުގައި ވައި ގަޑިއަކު 35 މޭލަށް ގަދަވާނެއެވެ. އުތުރުގެ ކަނޑުތައް މަޑުވާނެ ނަމަވެސް އެހެން ސަރަހައްދުތަކުގެ ކަނޑުތައް ގަދަވާނެ ކަމަށް މެޓް އޮފީހުން ލަފާކުރެއެވެ.