ޕީއެންސީގެ ފޯރިގަދަ ޖަލްސާގައި ވާހަކަފުޅު ދައްކަވަމުން ރައީސް ޑރ. މުޙައްމަދު މުޢިއްޒު ވިދާޅުވީ މި ސަރުކާރުގައި ސިޔާސީ ގޮތުން އެއްވެސް މީހަކު ހައްޔަރެއް ނުކުރާނެ ކަމަށެވެ. ވެރިކަމުގެ ނިމިގެންމިދާ ދެ އަހަރުގެ ތެރޭގައި އެއްވެސް ދިވެހި ރައްޔިތަކު ސިޔާސީ ވިސްނުމުގައި ހައްޔަރުކުރިތަން ފެނިފައިވޭތޯ ސުވާލުކުރައްވަމުން ރައީސް ވިދާޅުވީ، ކުރިޔަށް އޮތް ތަނުގައި ވެސް އެފަދަ ކަމެއް ނުފެންނާނެ ކަމަށެވެ.
ކުރީގެ ވެރިކަންތަކާއި ޚިލާފަށް މި ސަރުކާރުން ބަދަލު ހިފުމުގެ ރޫޙު ކުރިޔަށް ނުގެންދާނެ ކަމަށާއި، ސިޔާސީ ވިސްނުމުގައި ކޮންމެ ކަމެއް ކުރިޔަސް އެ މިނިވަންކަން ޤައުމުގައި ލިބިގެންވާނެ ކަމަށް ވެސް އެމަނިކުފާނު ވިދާޅުވިއެވެ. ރައީސް ފާހަގަކުރެއްވީ، މީގެ ކުރީގައި އަހަރުން އަހަރަށް ސިޔާސީ ގޮތުން މީހުން ޖަލަށްލެވިފައިވާ ކަމަށާއި، އެހެންނަމަވެސް މި ސަރުކާރުން އެފަދަ އަމަލެއް ނުހިންގާނެ ކަމަށެވެ.
ޤައުމަށް ހަޤީޤީ މާނައިގައި ހަމަޖެހުން އަންނާނީ ބަދަލު ހިފުމުގެ ނުބައި ވިހަ އޮއިވަރު ނައްތާލެވިގެން ޤައުމު އިސްކޮށްގެން ކަމަށް ރައީސް ވަނީ ވިދާޅުވެފައެވެ. ޕީއެންސީ އަކީ ބަދަލު ހިފުމުގެ ރޫޙު ނުގެންގުޅޭނެ ލަޝްކަރު ކަމުގައި އެމަނިކުފާނު ފާހަގަކުރެއްވިއެވެ.
ކޮމެންޓު ފޮނުވާ