ރާއްޖެއިން މަސްތުވާތަކެތީގެ ވަބާ ނައްތާލުމަށް ހިންގަވަމުންދާ ހަރަކާތްތަކުގެ ތެރެއިން، ޑްރަގް ވިޔަފާރިކުރާ މީހުންނަށް އިސްލާމްދީނުގައި ބަޔާންކޮށްފައިވާ އެންމެ ބޮޑު އަދަބު ދިނުމަށް ޤާނޫނު އިސްލާހުކުރައްވާނެކަމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވިދާޅުވެއްޖެއެވެ.
ޕީއެންސީގެ "ދިވެހީންގެރާއްޖެ" ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ މަސްތުވާތަކެތީގެ މައްސަލަ ހައްލުކުރެވެން އޮތީ ވިޔަފާރިވެރިން ހުއްޓުވައިގެން ކަމަށާއި، ބުރާސްފަތި ދުވަހު ކުރިއަށްގެންދިޔަ އޮޕަރޭޝަނަކީ މިހާތަނަށް ކުރިއަށްގެންދިޔަ އެންމެ ބޮޑު އޮޕަރޭޝަންކަމަށެވެ.
މަޖިލީހަށް ހުށަހަޅާފައިވާ މަސްތުވާތަކެތީގެ ޤާނޫނަށް ގެނައުމަށް ހުށަހަޅާފައިވާ އިސްލާހުގައި، ޑްރަގް އެތެރެކޮށް ވިޔަފާރިކުރާ މީހުންނަށް އިސްލާމްދީނުގައި އޮތް އެންމެ މަތީ އަދަބު ދިނުމަށް ކަނޑައަޅާފައި ފާސްކުރާނެކަމަށް އެމަނިކުފާނު ވިދާޅުވިއެވެ.
މަސްތުވާތަކެތީގެ ވަބާގައި ޖެހިފައިވާ ޒުވާނުންނަށް ފަރުވާދީ އަނބުރާ މުޖުތަމައަށް ނެރުމަކީ ސަރުކާރުގެ އެއް އަމާޒެއްކަމަށާއި، ކުރީ ސަރުކާރުތައް ފަސޭހަ ގޮތް ހިޔާރުކުރިއިރު، އެމަނިކުފާނު ކަންކަން ނިންމަވާނީ އެންމެ ރަނގަޅުގޮތަށްކަމަށް ރައީސް ފާހަގަކުރެއްވިއެވެ.
ކޮމެންޓު ފޮނުވާ