ދުނިޔޭގެ ހަކުރުބަލީގެ ދުވަހާ ގުޅިގެން މިއަދު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދިވެހިން ބަލިތަކާ ދުރު ދުޅަހެޔޮ ބަޔަކަށް ހެދުމަށް ކުޑައިރުއްސުރެ ޞިއްޙީ ރަނގަޅު އާދަތަކާ އަހުލުވެރިވުމުގެ މުހިންމުކަން ފާހަގަކުރައްވާފައެވެ.
އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ގައިގައިން ނާރާ ބަލިތަކުން ރައްކާތެރިވުމަށް ހަށިގަނޑަށް ގެއްލުންހުރި ކަންކަމާ ދުރުހެލިވެ، ހަރަކާތްތެރިވެ، ދުވަހުގެ ތާވަލު ރާވާލުމުގައިވެސް ޞިއްޙަތަށް ސަމާލުކަން ދިނުން މުހިންމު ކަމަށެވެ.
މި ދާއިރާގައި އަމިއްލަ ޖަމާޢަތްތަކާއި ފަރުދުންގެ ފެންވަރުގައި ކުރެވޭ މަސައްކަތް ފާހަގަކުރައްވައި ޝުކުރުއަދާކުރައްވަމުން، އެމަނިކުފާނު ވަނީ މިފަދަ ދުވަސްތަކުގައި ދިވެހިންނަކީ ބަލިތަކާ ދުރު ބާއްޖަވެރި ދިރިއުޅުމެއް ހޯދުމުގެ ޢަޒުމު އައު ކުރަން ޖެހޭ ކަމަށް ގޮވާލައްވާފައެވެ. ބައިނަލްއަޤްވާމީ ގޮތުން ހަކުރުބަލީއަށް ހޭލުންތެރިކަން އިތުރުކުރުމަށް މި ދުވަސް ކޮންމެ އަހަރަކުވެސް ފާހަގަކުރެއެވެ.
ކޮމެންޓު ފޮނުވާ