ރާއްޖެ އާއި ޗައިނާ ދެމެދު އޮތް ގުޅުން މިހާރު ތާރީހީ ގޮތުން ވެސް އާ އުސްމިނަކަށް ގެންދެވިފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. ޗައިނާގެ ޒިންހުއާ ނޫހަށް ދެއްވި އިންޓަވިއުއެއްގައި ރައީސް ވިދާޅުވީ ރާއްޖޭގެ ކޮންމެ ދިމާއަކަށް ބަލައިލިޔަސް ފެންނަން އޮތީ ޗައިނާއިން ފޯރުކޮށްދީފައިވާ ދީލަތި އެހީތަކާއި އުމްރާނީ ތަރައްގީގެ ނިޝާންތައްކަމަށެވެ.
ދެ ގައުމުގެ މެދުގައި ޒަމާނުއްސުރެ އޮތް މި ގާތް ގުޅުމުގެ ސަބަބުން ދެ ގައުމަށް ވެސް ގިނަ ގުނަ ފައިދާތަކެއް ލިބިފައިވާ ކަމަށާއި، ޗައިނާއިން ރާއްޖެއަށް ފޯރުކޮށްދިން އުމްރާނީ ތަރައްގީގެ އެހީތަކުގެ ސަބަބުން އިގުތިސާދީ، ސިޔާސީ އަދި އިޖުތިމާއީ ގޮތުން ގިނަ ދޮރުތަކެއް ހުޅުވިފައިވާކަމަށް އެމަނިކުފާނު ފާހަގަކުރެއްވިއެވެ. ވިޔަފާރި، ދަނޑުވެރިކަން، މަސްވެރިކަން، މުވާސަލާތު، ސިއްހަތު، ތައުލީމު އަދި ޑިޖިޓަލް އިގުތިސާދު ފަދަ ގިނަ ދާއިރާތަކުން ދެ ގައުމު ގުޅިގެން ކުރާ މަސައްކަތްތައް މިހާރު ވަނީ ހަލުވިވެފައިކަމަށް ރައީސް ފާހަގަކުރެއްވިއެވެ.
މި އަހަރުގެ ކުރީކޮޅު ދެ ގައުމުގެ މެދުގައި ގާއިމްކޮށްފައިވާ ފްރީ ޓްރޭޑް އެގްރީމަންޓަށް އަމަލުކުރަން ފެށުމާ އެކު ވިޔަފާރީގެ ގުޅުން ވަނީ މުޅީން އާ ހަރުފަތަކަށް ގެންދެވިފައިކަމަށް އެމަނިކުފާނު ވިދާޅުވިއެވެ. ރާއްޖެ އާއި ޗައިނާއާ ދެމެދު އޮތް ގުޅުމުގެ ބިންގަލަކީ ރަހުމަތްތެރިކަން ކަމަށާއި އިހުތިރާމާއި އެއްބާރުލުންދިނުމުގެ ރޫހުކަމަށާއި، ބޮޑު ގައުމަކުން ކުދި ގައުމަކަށް އެހީތެރިވުމުގައި ޗައިނާއިން ދައްކަމުންދާ ނަމޫނާއިން ރާއްޖެ ފަދަ ކުދި ގައުމަކަށް ހިތްވަރު ލިބޭކަމަށް ރައީސް ވިދާޅުވިއެވެ. ރާއްޖެއިން އަބަދުވެސް "ވަން ޗައިނާ" ސިޔާސަތަށް ތާއީދުކުރާނެކަމުގެ ޔަގީންކަން ދެއްވަމުން، ދެ ގައުމު ކުރިމަތިވާ ގޮންޖެހުންތަކުން އަރައިގަތުމަށް ގުޅިގެން މަސައްކަތް ކުރަން ރާއްޖެ ތައްޔާރަށް އޮތްކަމަށް ވެސް އެމަނިކުފާނު ވިދާޅުވިއެވެ.
ކޮމެންޓު ފޮނުވާ