ދިވެހި ސިފައިންގެ ވައިގެ ހިދުމަތުގެ ފުރަތަމަ އެއާ ސްޓޭޝަން އައްޑޫ ގަމުގައި ރަސްމީކޮށް ހުޅުވުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ، އިގްތިސާދު ހަރުދަނާކޮށް ތަރައްގީ ހާސިލުކުރެވޭ ވަރުގަދަ ގައުމަކަށް ރާއްޖެ ހެދުމަށް އަސްކަރިއްޔާގެ ބާރު ވަރުގަދަ ކުރުމަކީ ކޮންމެހެން ކުރަންޖެހިފައިވާ ކަމެއް ކަމަށެވެ.
ރައީސް ފާހަގަކުރެއްވި ގޮތުގައި މި އެއާ ސްޓޭޝަން ގާއިމް ކުރުމަކީ މުޅި ރާއްޖެ ވައިގެ މަގުން ބެލެހެއްޓުމަށް ލިބުނު ވަރަށް ބޮޑު ކުރިއެރުމެކެވެ. އުތުރުން ށ. ފުނަދޫގައި ވެސް ވައިގެ ސްޓޭޝަނެއް ގާއިމް ކުރުމުގެ މަސައްކަތް ބާރު ސްޕީޑެއްގައި ކުރިއަށް ގެންދާ ކަމަށާއި ކޯސްޓްގާޑުގެ ފްލީޓް ދެގުނަ ބޮޑު ކުރުމާއި ސިފައިންގެ މެރިން ކޯގެ ކެޕޭސިޓީ އިތުރު ކުރުމުގައި ވެސް ކާމިޔާބު މަސައްކަތްތައް ކުރެވެމުންދާ ކަމަށް ރައީސް ވިދާޅުވިއެވެ.
ރައީސް ވިދާޅުވީ ގައުމަށް ބޮޑެތި އިންވެސްޓްމަންޓްތައް އަންނާނީ އެ ގައުމަކީ ރައްކާތެރި ތަނެއްގެ ގޮތުގައި އިންވެސްޓަރުންނަށް ގަބޫލުކުރެވޭ ހިނދެއްގައި ކަމަށާއި ވައިގެ މަރުކަޒުގެ ގާބިލުކަން އިތުރުވުމުން ގައުމުގެ އިގްތިސާދު ވެސް ކުރިއަށް ދާނެ ކަމަށެވެ. ދުނިޔޭގައި ތަރައްގީވެފައިވާ އިސްލާމީ އަރަބި ގައުމުތަކުން ވެސް އަމަލު ކުރަނީ މި އުސޫލުން ކަމަށް ރައީސް ފާހަގަކުރެއްވިއެވެ.
އަންނަ އަހަރުގެ ބަޖެޓުގައި ސިފައިންގެ އިންސާނީ ތަރައްގީއަށް ފައިސާ ހިމަނާފައިވާ ކަމަށާއި ވައިގެ މަރުކަޒުގައި ޓްރެއިނިން ފެސިލިޓީއެއް ގާއިމް ކުރާނެ ކަމަށް ރައީސް ވިދާޅުވިއެވެ. ނޭޝަނަލް ސާވިސް ޕްރޮގްރާމުގެ ދަށުން އަންނަ އަހަރު ރެކްރޫޓުކުރާ މީހުންގެ އަދަދު ބޮޑުތަނުން އިތުރުކުރެވޭނެ ކަމަށާއި އެއާ ކޯއަށް އަސްކަރީ މަތިންދާބޯޓު ހޯދުމުގެ މަސައްކަތް ފަށާފައިވާ ކަމަށް ވެސް ރައީސް ވިދާޅުވިއެވެ. ރައީސް ވިދާޅުވީ މިއީ ގައުމުގެ މުސްތަގުބަލަށްޓަކާ ކުރެވޭ މަސައްކަތްތަކަކަށް ވާއިރު، މި ކަންކަން ކާމިޔާބުވުމުން މިނިވަން މުސްތަގިއްލު ތަރައްގީވެފައިވާ ގައުމަކަށް ހެދުމަށް ކުރާ މަސައްކަތަށް އެހީވާނެ ކަމަށެވެ.
ކޮމެންޓު ފޮނުވާ