މި އަހަރުގެ ޖޫން އަދި ޖުލައި މަހު އެމެރިކާ، މެކްސިކޯ އަދި ކެނެޑާ ގުޅިގެން ބާއްވާ ފީފާ ވޯލްޑް ކަޕް ފުޓްބޯޅަ މުބާރާތުގައި އީރާނުން ބައިވެރިނުވި ނަމަވެސް އެކަމާ އެއްވެސް ފަރުވާލެއް ނެތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
"ޕޮލިޓިކޯ" އަށް ދެއްވި އިންޓަވިއުއެއްގައި ޓްރަމްޕް ވިދާޅުވީ އީރާނަކީ މިހާރު ވަރަށް ބޮޑަށް ބަލިކަށިވެފައިވާ ގައުމެއް ކަމަށާއި، އެ ގައުމުގެ ޓީމު މުބާރާތުގައި ކުޅުނަސް ނުވަތަ ނުކުޅުނަސް އެމަނިކުފާނަށް އެއީ މައްސަލައެއް ނޫން ކަމަށެވެ. އަދި އެކަމާ ހަގީގަތުގައިވެސް އަޅާނުލައްވާ ކަމަށް ޓްރަމްޕް ފާހަގަކުރެއްވިއެވެ.
ވޯލްޑް ކަޕްގެ ގުރޫޕް ސްޓޭޖުގައި އީރާނުން ކުޅެން ހަމަޖެހިފައިވާ ތިން މެޗު ވެސް ތާވަލުކޮށްފައިވަނީ އެމެރިކާގެ ފަސްގަނޑުގައެވެ. އެއީ ލޮސް އެންޖެލެސްގައި ކުޅޭ ދެ މެޗާއި ސިއެޓްލްގައި ކުޅޭ މެޗެކެވެ. ނަމަވެސް އެމެރިކާއާއި އިޒްރޭލުން އީރާނާ ދެކޮޅަށް ހިންގަމުންދާ އަސްކަރީ ހަރަކާތްތަކުގެ ސަބަބުން މެދުއިރުމަތީގެ މަސްރަހު ގޯސްވެ، އީރާނު ޓީމަށް އެމެރިކާއަށް ދަތުރުކުރެވިދާނެ ކަމާމެދު ވަނީ ބޮޑެތި ސުވާލުތަކެއް އުފެދިފައެވެ.
މިކަމުގެ ނިޝާންތައް ފެންނަން ފަށާފައިވާއިރު، މި ހަފުތާގައި އެމެރިކާގެ އެޓްލާންޓާގައި ބޭއްވި ފީފާގެ ޕްލޭނިން ސަމިޓަށް ހާޒިރުނުވި ހަމައެކަނި ގައުމަކީވެސް އީރާނެވެ. އީރާނުގެ ފުޓްބޯޅަ ފެޑަރޭޝަނުގެ ރައީސް މަހްދީ ތާޖް ވިދާޅުވެފައިވަނީ ހަނގުރާމައިގެ ހާލަތާ ގުޅިގެން މުބާރާތް ބޭއްވުމަށް އެކަށީގެންވާ މާހައުލެއް ނެތް ކަމަށެވެ.
އީރާނަކީ އޭޝިއާ ކޮލިފައިންގެ އެއްވަނަ ހޯދައި، ޖެހިޖެހިގެން ހަތަރު ވަނަ ފަހަރަށް ވޯލްޑް ކަޕުން ޖާގަ ކަށަވަރުކޮށްފައިވާ ވަރުގަދަ ޓީމެކެވެ. އީރާނުން މުބާރާތް ބޮއިކޮޓް ކޮށްފާނެ ކަމުގެ އަޑުތައް ގަދަވެފައިވީ ނަމަވެސް، ދުނިޔޭގެ ފުޓްބޯޅައިގެ މައި އިދާރާ ފީފާއިން މިކަމާ ގުޅޭގޮތުން ރަސްމީކޮށް އަދި ވަކި އެއްޗެއް ހާމަކޮށްފައެއް ނުވެއެވެ.
ކޮމެންޓު ފޮނުވާ