އެމެރިކާ އާއި އިޒްރޭލުން ގުޅިގެން އިރާނަށް ދެމުންގެންދާ ހަމަލާތަކަކީ އިންސާނިއްޔަތާ ޚިލާފު އަދި އެއްވެސް އުސޫލެއް ނެތް ފިނޑި އަމަލުތަކެއް ކަމަށް ކުރީގެ ރައީސް މައުމޫން އަބްދުލްގައްޔޫމް ސިފަކުރައްވައިފިއެވެ.
މައުމޫން ފައުންޑޭޝަންގެ އިހްޔާ ޕްރޮގްރާމުގެ ދެވަނަ ޖަލްސާގައި ވާހަކަފުޅު ދައްކަވަމުން ރައީސް މައުމޫން ވިދާޅުވީ، އެމެރިކާ އާއި އިޒްރޭލު ގުޅިގެން ދިން ހަމަލާއެއްގައި އިރާނުގެ ރޫހާނީ ލީޑަރު އާޔަތުالله ހާމަނާއީ އަވަހާރަކޮށްލުމަކީ މުޅި އިސްލާމީ އުންމަތަށް ލިބުނު ފޫނުބެދޭވަރުގެ ބޮޑު ހިތާމައެއް ކަމަށެވެ. އެމަނިކުފާނު ފާހަގަކުރެއްވި ގޮތުގައި ހާމަނާއީ އަވަހާރަކޮށްލާފައިވަނީ އޮފީސްކޮޅުގައި މަސައްކަތްޕުޅުގައި އިންނަވަނިކޮށް ބޮން އަޅައިގެންނެވެ. މިއީ އަނިޔާވެރިކަމުގެ އިންތިހާ ކަމަށާއި މިފަދަ ކަންކަމަށް ރުހިގެން ނުވާނެކަމަށް މައުމޫން ވިދާޅުވިއެވެ.
މި ހަމަލާތަކަށް ފާޑުވިދާޅުވަމުން މައުމޫން ވިދާޅުވީ ބޮޑެތި ގައުމުތަކުގެ ވެރިން ރައްކާތެރިކަމާއެކު ތިބެ، ޒަމާނީ ރޮކެޓާއި ނުރައްކާތެރި ހަތިޔާރު ބޭނުންކޮށްގެން އެހެން މީހުން ޣާފިލުކަމުގައި ނުވަތަ މަސައްކަތުގައި ތިއްބާ މެރުމަކީ "ފިނޑިކަމުގެ ކޮޅެއް ނެތް" އަމަލުތަކެއް ކަމަށެވެ. ހަނގުރާމަ ކުރުމުގައިވެސް ވަކި ހަމަތަކަކާއި އުސޫލުތަކެއް އޮންނަން ޖެހޭނެކަން ފާހަގަކުރައްވައި އެމަނިކުފާނު ވިދާޅުވީ، ބޭނުންހާ ގޮތަކަށް މީހުން މަރައި ތަންތަން ސުންނާފަތި ކުރުމަކީ ބަލައިގަނެވޭނެ ކަމެއް ނޫން ކަމަށެވެ. މި ހަމަނުޖެހުންތަކުގެ ތެރޭގައި، އެމެރިކާ އާއި އިޒްރޭލުގެ ހަމަލާތަކުގެ ރައްދުގައި އިރާނުން ވެސް ގެންދަނީ މެދުއިރުމަތީގައި ހުރި އެ ގައުމުތަކުގެ އަސްކަރީ މަރުކަޒުތަކަށް އަމާޒުކޮށް ހަމަލާތައް ދެމުންނެވެ.
ކޮމެންޓު ފޮނުވާ