އެމެރިކާގެ އަސްކަރިއްޔާއިން ކުރިއަށްގެންދާ ވަރުގަދަ އޮޕަރޭޝަނެއްގައި، އީރާނުގެ 2،000 އަށްވުރެ ގިނަ އަމާޒުތަކަށް ހަމަލާދީފައިވާކަން އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހާމަކޮށްފިއެވެ.
ސެންޓްކޮމްގެ ޗީފް އެޑްމިރަލް ބްރެޑް ކޫޕާ ވިދާޅުވި ގޮތުގައި، ހޮނިހިރު ދުވަހުން ފެށިގެން އެމެރިކާއިން ދަނީ އީރާނުގެ އެކި ސަރަހައްދުތަކަށް ވަރުގަދަ ހަމަލާތަކެއް ދެމުންނެވެ. މި ހަމަލާތަކުގައި އީރާނުގެ ކަނޑުގެ ލަޝްކަރަށް ނިސްބަތްވާ 17 އުޅަނދެއް ވަނީ ހަލާކުކޮށްލާފައެވެ. އޭގެ ތެރޭގައި ސަބްމެރިނެއް ވެސް ހިމެނޭކަން އެޑްމިރަލް ކޫޕާ ފާހަގަކުރެއްވިއެވެ.
މި އަސްކަރީ ހަރަކާތުގައި އެމެރިކާގެ 50،000 އަށްވުރެ ގިނަ ސިފައިން ހަރަކާތްތެރިވަމުންދާއިރު، ޒަމާނީ ހަތިޔާރުގެ ބޭނުން ދަނީ ވަރަށް ބޮޑަށް ހިފަމުންނެވެ. އެގޮތުން 200 ހަނގުރާމަމަތީ މަތިންދާބޯޓާއި، ބޮން އަޅާ ބޯޓުފަހަރުގެ އިތުރުން، އެމެރިކާގެ ދެ އެއާކްރާފްޓް ކެރިއަރު ވެސް މި އޮޕަރޭޝަންގައި ބައިވެރިވަމުންދާކަމަށް މައުލޫމާތު ލިބެއެވެ.
މީގެ އިތުރުން، އެމެރިކާއާއި އިޒްރޭލުން ގުޅިގެން ދެމުންދާ މި ހަމަލާތައް އީރާނުގެ މަދަނީ ތަންތަނަށް ވެސް އަމާޒުވަމުންދާކަމަށް ވަނީ ރިޕޯޓުކޮށްފައެވެ. އޭގެ ތެރޭގައި އާންމުންގެ ގެދޮރާއި، ސްކޫލްތަކުގެ އިތުރުން ހޮސްޕިޓަލްތައް ފަދަ ހައްސާސް ތަންތަނަށް ބޮން އަޅަމުންދާކަން ފާހަގަކުރެވެއެވެ.
ކޮމެންޓު ފޮނުވާ