ނަސްރުގެ ދުވަހުގެ މުނާސަބަތުގައި ރައީސް ޑރ. މުހައްމަދު މުއިއްޒު ވިދާޅުވެފައިވަނީ ދިވެހިންގެ މާދަމާގެ އުފާވެރި ކަމަށް ކުރާ އުންމީދުތަކުގައި ކުލަޖައްސައިދޭނީ ވަޠަނަށް އިހުލާސްތެރިކަމާއެކު ހިދުމަތްކުރާ މީހުން ކަމަށެވެ.
އެކްސްގައި ކުރެއްވި ޕޯސްޓެއްގައި ރައީސް ފާހަގަކުރެއްވީ 1988 ވަނަ އަހަރުގެ ނޮވެންބަރު 3 ވަނަ ދުވަހު ޤައުމު ދިފާޢުކޮށްދިން ހިތްވަރުގަދަ ދިވެހިން ސާބިތުކޮށްދިން ކަމަށެވެ. އަލިރަސްގެފާނާއި ބޮޑުތަކުރުފާނާއި ދޮންބަންޑާރައިން ފަދައިން ޤައުމުގެ ސިޔާދަތާއި މިނިވަންކަން އިސްކޮށް، ޤައުމު ގޮވައިލި ކޮންމެ ވަގުތަކު ހިތާއި ރޫހުން އިޖާބަދޭން ތިބި ފަހުލަވާނުން މި ފަސްގަނޑުގައި އަބަދުމެ ތިބޭނެ ކަމަށް ރައީސް ވިދާޅުވިއެވެ.
ރައީސް ޔަޤީންކަމާއެކު ވިދާޅުވީ ކޮންމެ ދާއިރާއަކުން ވެސް ވަޠަނުގެ ކުރިއެރުމާއި މަޞްލަޙަތަށް އިސްކަންދީ މުރާލިކަމާއެކު ޚިދުމަތްކުރާ އިޚްލާޞްތެރިން މާދަމާގެ އުންމީދުތަކުގައި ކުލަޖައްސައިދޭނެ ކަމަށެވެ. ނަސްރުގެ ދުވަސް ފާހަގަކުރަނީ ދިވެހިންގެ ބަޔަކާއި ލަންކާގެ ތަމަޅައިންގެ ބަޔަކު 1988 ގައި ރާއްޖެއަށް ހަމަލާދީ ދިވެހި ސިފައިން އެމީހުންނަށް ރައްދު ހަމަލާދީ ހޯދި ކާމިޔާބީ ފާހަގަކުރުމުގެ ގޮތުންނެވެ.
ކޮމެންޓު ފޮނުވާ