އައްޑޫ ސިޓީގެ ހަންކެޑެ ފަތުރުވެރިކަމުގެ މަޝްރޫއު ރައީސް ޑރ. މުހައްމަދު މުއިއްޒުގެ މި ދައުރު ތެރޭގައި ނިންމައި އޮޕަރޭޝަނަށް ގެނައުމަށް ސަރުކާރުން އަމާޒުހިފާފައިވާ ކަމަށް މިނިސްޓަރ އޮފް ޓޫރިޒަމް އެންޑް އެންވަޔަރަމަންޓް އިބްރާހީމް ތޯރިގް މިއަދު ވިދާޅުވެއްޖެ އެވެ.
ހަންކެޑެ ފަތުރުވެރިކަމުގެ ބޭނުމަށް ތަރައްގީކުރުމުގެ މަސައްކަތް އަވަސްކުރުމަށްޓަކައި، ރިއަލް އެސްޓޭޓް ޓޫރިޒަމަށް އެރަށް ކަނޑައެޅި ގަރާރު ރައީސް ވަނީ އުވާލައްވާފަ އެވެ. މިނިސްޓަރު ތޯރިގް ވިދާޅުވި ގޮތުގައި، މި ނިންމުމާއެކު ޓޫރިޒަމް މިނިސްޓްރީ އާއި މޯލްޑިވްސް ފަންޑް މެނޭޖްމަންޓް ކޯޕަރޭޝަނާ ދެމެދު ވެފައިވާ އެއްބަސްވުން ބާތިލުކޮށްފައިވާއިރު، އެރަށް ހަލާލް ޓޫރިޒަމް ތަރައްގީކުރުމަށް ހުޅުވާލެވުނު ރަށްތަކުގެ ލިސްޓުން ވެސް އުނިކޮށްފައިވާ ކަމަށެވެ.
މިނިސްޓްރީން މިހާރު ކުރަމުން ގެންދަނީ ހަންކެޑެ އިންޓަގްރޭޓެޑް ޓޫރިޒަމް މަޝްރޫއެއްގެ ގޮތުގައި ތަރައްގީކުރުމަށް ބަލަންޖެހޭ އެންމެހައި ކަންކަން ބަލައި، ބީލަމުގެ އުސޫލުން ފަތުރުވެރިކަމަށް ހުޅުވާލުމުގެ މަސައްކަތް ކަމަށް މިނިސްޓަރު ފާހަގަކުރެއްވި އެވެ. ސަރުކާރުގެ އަމާޒަކީ މިއަހަރު ތެރޭގައި ހަންކެޑެ ތަރައްގީކުރުމުގެ އަމަލީ މަސައްކަތް ފަށައި، ރައީސް މުއިއްޒުގެ މި ދައުރުގައި އެރަށް ފަތުރުވެރިކަމަށް ހުޅުވުން ކަމަށް މިނިސްޓަރު ވިދާޅުވި އެވެ.
ހަންކެޑެގެ ބަދަލުގައި އައްޑޫ އަތޮޅުގެ ދޮންހެރަ ހަލާލް ޓޫރިޒަމް ތަރައްގީކުރުމަށް މިނިސްޓްރީގެ ފަރާތުން މިއަދު ބީލަމަށް ހުޅުވާލެވިގެންދާނެ ކަމަށް ވެސް މިނިސްޓަރު ތޯރިގް ވިދާޅުވި އެވެ. މިއީ އައްޑޫ ސިޓީގައި ފަތުރުވެރިކަން ތަރައްގީކުރާނެ ކަމަށް ރައީސް ޑރ. މުއިއްޒު ދެއްވި ރިޔާސީ ވައުދު ފުއްދުމަށް ކުރަމުންދާ މަސައްކަތުގެ ބައެއް ކަމަށް މިނިސްޓަރު ފާހަގަކުރެއްވި އެވެ.
އައްޑޫ ސިޓީގައި ފަތުރުވެރިކަން ތަރައްގީކުރުމުގެ މަޝްރޫއުތަކަކީ ސަރަހައްދީ އިގްތިސާދު ފުޅާކޮށް، އެސިޓީގެ ރައްޔިތުންނަށް ވަޒީފާގެ ފުރުސަތުތައް އިތުރުކުރުމަށް ސަރުކާރުން ދޭ އިސްކަން ބޮޑު މަޝްރޫއުތަކުގެ ތެރޭގައި ހިމެނޭ ކަންކަން ކަމުގައި ވެސް މިނިސްޓްރީން ބުނެ އެވެ.
ކޮމެންޓު ފޮނުވާ