މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން ހާމަކޮށްފައިވާ ގޮތުގައި، ދިވެހިރާއްޖޭގައި ހިންގުމަށް ހުއްދަ ލިބިފައިވާ ތަޢުލީމީ ޕްރޮގްރާމްތަކެއް ރާއްޖެއިން ބޭރުގައި ގާނޫނާ ޚިލާފަށް ހިންގައި، ބޭރުގެ ދަރިވަރުންނަށް ސަނަދު ދޫކޮށްފައިވާ ކަން ފާހަގަކުރެވިއްޖެއެވެ.
މި މައްސަލަ އެމްކިއުއޭގެ ސަމާލުކަމަށް އައީ ރާއްޖެއިން ބޭރުގެ ތިން ގައުމެއްގެ ރަސްމީ އިދާރާތަކުން، އެ ދަރިވަރުންނަށް ދޫކޮށްފައިވާ ސަނަދުތަކުގެ ސައްޙަކަން ކަށަވަރުކުރުމަށް އެދި ގުޅުމުންނެވެ. ނަމަވެސް އެ ގައުމުތަކަކީ ކޮބައިކަން އަދި މި ޢަމަލު ހިންގި މަރުކަޒަކީ ކޮން ތަނެއްކަން އެމްކިއުއޭ އިން ހާމަކޮށްފައެއް ނުވެއެވެ.
އެމްކިއުއޭގެ ނޫސްބަޔާނުގައި ބުނެފައިވާ ގޮތުގައި، ރާއްޖޭގައި ރަޖިސްޓްރީކޮށްގެން ހިންގާ މަތީ ތަޢުލީމާއި ތަމްރީނުދޭ މަރުކަޒުތަކުން، އެ މަރުކަޒުތަކުން ބޭރުގައި ޕްރޮގްރާމް ހިންގައިގެން ސަނަދު ދިނުމުގެ ހުއްދައެއް އެއްވެސް ފަރާތަކަށް ދީފައެއް ނުވެއެވެ. މި ކަން ބޭރުގެ އިދާރާތަކަށް ވަނީ ސާފުކޮށް އަންގާފައި ކަމަށް އެމްކިއުއޭ އިން ބުނެއެވެ.
މި މައްސަލައިގެ ސަބަބުން ރާއްޖެއިން ބޭރުގެ ދަރިވަރުންތަކަކަށް ބޮޑެތި ގެއްލުންތަކެއް ކުރިމަތިވަމުންދާ ކަމަށާއި، މި ކަމުގެ ފުރިހަމަ ޒިންމާ އުފުލަންޖެހޭނީ އެ ޕްރޮގްރާމްތައް ހިންގި މަރުކަޒުން ކަމަށް އެމްކިއުއޭ އިން ވަނީ ފާހަގަކޮށްފައެވެ.
އެމްކިއުއޭ އިން އެކްރެޑިޓޭޝަން ދީފައިވާ ޕްރޮގްރާމުތައް ރާއްޖެއިން ބޭރުގައި ހިންގުމާބެހޭ ގަވާއިދު މި މަހުގެ 10 ވަނަ ދުވަހު އަމަލުކުރަން ފެށިފައިވާއިރު، އޭގެ ކުރިން ރާއްޖޭގައި ހިންގުމަށް ހުއްދަ ދޫކޮށްފައިވާ ޕްރޮގްރާމުތައް ރާއްޖެއިން ބޭރުގައި ހިންގުމުގެ އެކްރެޑިޓޭޝަން އެއްވެސް ފަރާތަކަށް ދޫކޮށްފައެއް ނުވާ ކަމަށް އެ އޮތޯރިޓީން ބުނެއެވެ.
މިފަދަ ޢަމަލުތަކުގެ ސަބަބުން ބައިނަލްއަގުވާމީ ފެންވަރުގައި ދިވެހިރާއްޖޭގެ މަތީ ތަޢުލީމީ މުއައްސަސާތަކާ މެދު ގާއިމުވެފައިވާ އިތުބާރަށް ނިކަމެތި އަސަރުކުރާނެ ކަމަށް އެމްކިއުއޭ އިން ވަނީ އިންޒާރުދީފައެވެ. ރާއްޖެއިން ބޭރުގައި ތަޢުލީމީ ޕްރޮގްރާމެއް ހިންގަން ބޭނުންވާ ފަރާތްތަކުން، އެމްކިއުއޭގެ އައު ގަވާއިދާ އެއްގޮތަށް ރަސްމީ ހުއްދަ ހޯދައިގެން ކުރިއަށް ގެންދިއުމަށް އެ އޮތޯރިޓީން ވަނީ އިލްތިމާސްކޮށްފައެވެ.
ފާހަގަކޮށްލެވޭ ކަމަކީ، މީގެ ކުރިން ވެސް މިފަދަ މައްސަލަތައް ދިމާވެ، ތަޢުލީމީ ދާއިރާގެ ފެންވަރު ހިފެހެއްޓުމަށް އެމްކިއުއޭ އިން ފިޔަވަޅު އަޅަންޖެހިފައިވާ ކަން ފާހަގަކުރެވެއެވެ.
ކޮމެންޓު ފޮނުވާ