ތ. ކިނބިދޫ އާއި ވޭމަންޑޫ ގުޅާލުމަށް އެޅުމަށް ހަމަޖެހިފައިވާ ކޯޒްވޭގެ މަސައްކަތް ކުރިއަށް ގެންދާނީ، އެ ދެ ރަށުގެ ދޭތެރޭގައި އޮންނަ އެލާ، އިންޓަގްރޭޓެޑް ޓޫރިޒަމް އައިލެންޑެއްގެ ގޮތުގައި ތަރައްގީކުރުމާ އެއްކޮށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ތ. އަތޮޅަށް ކުރެއްވި ދަތުރުފުޅުގައި ވޭމަންޑޫ ރައްޔިތުންނާ ބައްދަލުކުރައްވައި ރައީސް ވިދާޅުވީ، ދެ ރަށުގެ ދެމެދުގައިވާ ދުރުމިނަށް ބަލާއިރު، ސަރުކާރުގެ ބަޖެޓުން ހޭދަކޮށްގެން ސީދާ ޕީއެސްއައިޕީ ޕްރޮޖެކްޓެއްގެ ގޮތުގައި މަސައްކަތް ކުރުމަށްވުރެ، ކޮންޓްރެކްޓާ ފައިނޭންސިން އުސޫލުން ކުރިއަށް ގެންދިއުން ފައިދާ ބޮޑު ކަމަށެވެ. މި ގޮތުން ކޮންސްޓްރަކްޝަން މިނިސްޓްރީން މި މަހުގެ 22 ގައި މި ޕްރޮޖެކްޓަށް އިއުލާންކޮށްފައިވާ ކަން ރައީސް ފާހަގަކުރެއްވިއެވެ.
ކޯޒްވޭ އެޅުމުގެ މަޝްރޫއު ހިންގާނެ ގޮތް ތަފްސީލުކޮށްދެއްވަމުން ރައީސް ވިދާޅުވީ، އިންޓަގްރޭޓެޑް ޓޫރިޒަމް އައިލެންޑެއްގެ ގޮތުގައި ދެ ރަށުގެ ދޭތެރޭގައިވާ އެލާގައި އިންވެސްޓްކުރުމުގެ ފުރުސަތު ހުޅުވާލާނެ ކަމަށެވެ. މި މަޝްރޫއު ނަގާ ފަރާތަކަށް ކްރޮސް ސަބްސިޑީ މޮޑެލަކުން މަސައްކަތް ކުރެވޭނެ ކަމަށާއި، އިންވެސްޓްމަންޓް ރިކަވަރ ކުރުމަށް އިންވެސްޓާ ލޯން ފައިނޭންސް އާއި ކޮންޓްރެކްޓާ ފައިނޭންސް ފަދަ އެކި މޮޑެލްތައް ހުށަހެޅިދާނެ ކަމަށް ރައީސް ވިދާޅުވިއެވެ.
ތ. އަތޮޅުގައި ޓޫރިޒަމް ފުޅާކުރުމަކީ ސަރުކާރުގެ ވައުދެއް ކަމަށާއި، މި ކޯޒްވޭ ޕްރޮޖެކްޓަށް އިންވެސްޓަރުންގެ ޝައުގުވެރިކަން އިތުރުވާނެ ކަމަށް ރައީސް ވިދާޅުވިއެވެ. ޓޫރިޒަމް ތަރައްގީ ނުވެފައިވާ ސަރަހައްދުތަކުގައި ރިސޯޓް ތަރައްގީކުރުމަށް މިދިޔަ ޖޫން މަހު ދެ އަހަރު ދުވަހުގެ މުއްދަތަކަށް ވަރަށް ބޮޑެތި ޑިސްކައުންޓްތަކާއި ލުއިތައް ދީފައިވާ ކަމަށް ރައީސް ހާމަކުރެއްވިއެވެ. މި ލުއިތަކުގެ ސަބަބުން ބައެއް ފަރާތްތަކުން ވަނީ ތ. އަތޮޅުގައި ޓޫރިޒަމަށް އިންވެސްޓްކުރަން ޝައުގުވެރިކަން ފާޅުކޮށްފައެވެ.
ވޭމަންޑޫއަކީ ތ. އަތޮޅުގައި ވެރިކަންކުރާ ރަށަށްވާތީ، އެ ރަށުގައި ގިނަ ހިދުމަތްތައް ގާއިމުވެފައިވެއެވެ. ކޯޒްވޭ އެޅުމުން ކިނބިދޫގެ ރައްޔިތުންނަށް ވެސް މި ހިދުމަތްތައް ފަސޭހަކަމާއެކު ލިބޭނެއެވެ. ކިނބިދޫ-ވޭމަންޑޫ ކޯޒްވޭގެ އިތުރުން ތ. މަޑިފުށީ-ދިޔަމިގިލީ ކޯޒްވޭ އެޅުމަކީ ވެސް ރައީސް މުއިއްޒުގެ ރިޔާސީ ވައުދެއް ކަމަށާއި، ދެ ކޯޒްވޭގެ މަސައްކަތް ވެސް ފުރިހަމަކޮށްދޭނެ ކަމަށް މީގެ ކުރިން ރައީސް ވައުދުވެވަޑައިގެންފައިވެއެވެ.
ކޮމެންޓު ފޮނުވާ