ރާއްޖޭގައި ޗައިނީސް ޔުއާން އެކައުންޓް ތައާރަފްކުރުމުން ދެ ގައުމުގެ މެދުގައި ސޮއިކޮށްފައިވާ މިނިވަން ވިޔަފާރީގެ އެއްބަސްވުމަށް ކުރިއެރުން ލިބޭނެކަމަށް ޗައިނާގެ ސަފީރު ކޮން ޝިއުންހުއާ ވިދާޅުވެއްޖެއެވެ. ބޭންކް އޮފް މޯލްޑިވްސްގެ މައި އޮފީހުގައި އިއްޔެ ބޭއްވުނު ޚާއްޞަ ރަސްމިއްޔާތެއްގައި މި އެކައުންޓް ވަނީ ރަސްމީކޮށް ތައާރަފްކޮށްފައެވެ.
ސަފީރު ޝިއުންހުއާ ފާހަގަކުރެއްވި ގޮތުގައި، ބީއެމްއެލްގައި ޗައިނީޒް ޔުއާން އެކައުންޓް ހުޅުވޭނެ ގޮތް ހަމަޖެހުމަކީ ދެ ގައުމުގެ ދެމެދުގައި އޮތް އެފްޓީއޭ އެއްބަސްވުމަށް ލިބޭ ބޮޑު ކުރިއެރުމެކެވެ. މިއާއެކު ލޯކަލް ކަރަންސީ ސެޓްލްމަންޓް ފުޅާކުރުމުން ރާއްޖޭގެ އިގްތިސާދަށް ފައިދާތަކެއް ކުރާނެކަމަށް އޭނާ ވިދާޅުވިއެވެ.
މި އިންތިޒާމުގެ ދަށުން އެކްސްޗޭންޖް ރޭޓް ބަދަލުވުމުގެ ނުރައްކަލާއި ފޮރިން އެކްސްޗޭންޖްގެ ޚަރަދު ކުޑަވެ، ކެޕިޓަލް ބޭނުންކުރުމުގެ ފުރިހަމަކަން އިތުރުވާނެކަމަށް ސަފީރު ބުންޏެވެ. އަދި ކްރޮސް-ބޯޑާ މުއާމަލާތްތަކުގައި ވިޔަފާރިތަކަށް ލުއިފަސޭހަ އަދި ރައްކާތެރި މާލީ ޚިދުމަތްތައް ލިބި، މާލީ ނިޒާމުގެ މިނިވަންކަން ބޮޑުވާނެކަމަށް ވެސް އޭނާ ފާހަގަކުރެއްވިއެވެ.
ފާއިތުވި އަހަރުގެ ސެޕްޓެމްބަރު މަހު ޕީޕަލްސް ބޭންކް އޮފް ޗައިނާއާއި މިނިސްޓްރީ އޮފް އިކޮނޮމިކް އެންޑް ޓްރޭޑާ ގުޅިގެން، ކަރަންޓް އެކައުންޓް މުއާމަލާތްތައް ސެޓްލްކޮށް ލޯކަލް ކަރަންސީތަކަށް އިންވެސްޓްކުރުމުގެ ފުރުޞަތު ފަހިކުރުމަށް މެމޮރެންޑަމް އޮފް އަންޑަސްޓޭންޑިންގެއްގައި ސޮއިކޮށްފައިވެއެވެ. މިކަމުން ދިވެހި ފައިސާގެ ބޭނުން ފުޅާވެ، ވިޔަފާރިއާއި އިންވެސްޓްމަންޓްތަކަށް އާ ފުރުޞަތުތައް ހުޅުވިގެންދާނެއެވެ.
މި އަހަރުގެ ޖެނުއަރީ މަހު ޗައިނާ-މޯލްޑިވްސް ފްރީ ޓްރޭޑް އެގްރީމަންޓަށް ރަސްމީކޮށް އަމަލުކުރަން ފެށިފައިވާކަން ސަފީރު ހަނދުމަކޮށްދެއްވިއެވެ. ޔުއާން އެކައުންޓް ތައާރަފްކުރުމަކީ ލޯކަލް ކަރަންސީ ސެޓްލްމަންޓް އެގްރީމަންޓް ތަންފީޒުކުރުމަށް އެޅޭ މުހިންމު ފިޔަވަޅެއްކަމުގައި އޭނާ ވިދާޅުވިއެވެ.
ރަސްމިއްޔާތުގައި ވާހަކަދައްކަވަމުން ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފު އިއުލާންކުރެއްވީ، 2026 ވަނަ އަހަރުގެ ޖެނުއަރީ މަހުން ފެށިގެން ޔުނިއަންޕޭ ކާޑުތައް ބީއެމްއެލްއިން ދޫކުރަން ފަށާނެކަމެވެ. މި ކާޑުތައް ފަރުދުންނަށާއި ވިޔަފާރިތަކަށް ދޫކުރުމަށް ވަނީ ހަމަޖެހިފައިކަމަށް އޭނާ ވިދާޅުވިއެވެ.
ޔުނިއަންޕޭ ކާޑަކީ ދުނިޔޭގެ 180 އަށްވުރެ ގިނަ ޤައުމުގައި ބަލައިގަންނަ، ބައިނަލްއަޤްވާމީ ޕޭމަންޓް ނެޓްވޯކްގައި ބޭނުންކުރެވޭ ކާޑެކެވެ. މި ކާޑު ތައާރަފްކުރުމަކީ ޗައިނާއާއި ރާއްޖެއާ ދެމެދު މާލީ ގުޅުންތައް އިތުރަށް ވަރުގަދަވެފައިވާކަން ދައްކުވައިދޭ އަނެއް ނިޝާނެކެވެ.
ކޮމެންޓު ފޮނުވާ