މޯލްޑިވްސް ކޮލިފިކޭޝަން އޮތޯރިޓީ (އެމްކިޔުއޭ) އިން ދޫކުރާ ލިޔުންތަކުގައި އަސްލާ އެއްގޮތްކަމުގެ ތައްގަނޑު ޖެހުމުގެ ޚިދުމަތް ދޭނީ ހަމައެކަނި އެ އޮތޯރިޓީން ކަމަށް ކަނޑައަޅައި، އައު އުސޫލެއް ގެޒެޓުކޮށްފިއެވެ. މި އުސޫލު އިއްޔެ ގެޒެޓުގައި ޝާއިޢުކުރުމާއެކު، އެ ދުވަހުން ފެށިގެން ވަނީ އަމަލުކުރަން ފަށާފައެވެ.
"މޯލްޑިވްސް ކޮލިފިކޭޝަންސް އޮތޯރިޓީން ދޫކޮށްފައިވާ ލިޔެކިޔުންތަކުގައި އަސްލާ އެއްގޮތްކަމުގެ ތައްގަނޑު ޖެހުމާ ގުޅޭ އުސޫލު" ގެ ނަމުގައި އާންމުކުރި މި އުސޫލުގެ ބޭނުމަކީ އެމްކިޔުއޭގެ ލިޔުންތަކުގެ ސައްހަކަން ފަސޭހައިން ކަށަވަރުކޮށް، އެޓެސްޓޭޝަން ޚިދުމަތް ދިނުމުގައި ޢަމަލުކުރާނެ އިޖުރާއާތުތައް ކަނޑައެޅުމެވެ.
މި އުސޫލުގެ ދަށުން އަސްލާ އެއްގޮތްކަމުގެ ތައްގަނޑު ޖަހައިދޭނީ ވެލިޑޭޓް ސަނަދުތަކާއި، އެސެސްމެންޓް ރިޕޯޓުތަކާއި، ރިކޮގްނިޝަން އޮފް އިންޓެންޑެޑް ޕްރޮގްރާމްގެ ލިޔުންތަކާއި، ބޭރުގެ ސަނަދުތައް ގަބޫލުކުރުމަށްފަހު ދޫކުރާ ލިޔުންތަކުގެ ކޮޕީގައެވެ. މި ޚިދުމަތް ހޯދުމަށް ފޯމު ހުށަހަޅާތާ ރަސްމީ ތިން ދުވަހުގެ ތެރޭގައި ތައްގަނޑު ޖަހައިދޭނެއެވެ. ފޯމާއެކު ވެރިފަރާތުގެ އައިޑީ ކާޑުގެ ކޮޕީ ހުށަހަޅަން ޖެހޭނެއެވެ.
އިތުރަށް، ވެލިޑޭޓް ކުރުމަށް ނުވަތަ އެސެސްމެންޓް ރިޕޯޓު ހޯދުމަށް ނުވަތަ ބޭރުގެ ސަނަދު ގަބޫލުކުރުމަށް އެދި ހުށަހަޅާ ފޯމުގައި އެޓެސްޓޭޝަން ބޭނުންވާކަން ފާހަގަކޮށްފައިވާނަމަ، އެ ލިޔުން ދޫކުރާއިރު އަސްލާ އެއްގޮތްކަމުގެ ތައްގަނޑު ޖަހައިދޭނެއެވެ.
ފީގެ ގޮތުގައި ވެލިޑޭޓް ސަނަދު، އެސެސްމެންޓް ރިޕޯޓު އަދި އިންޓެންޑެޑް ލެޓަރުގެ ކޮންމެ ސަފުހާއަކަށް 10 ރުފިޔާ ނެގޭނެއެވެ. ބޭރުގެ ސަނަދުތައް ގަބޫލުކުރުމަށްފަހު ދޫކުރާ ލިޔުމުގެ ކޮންމެ ސަފުހާއަކަށް 20 ރުފިޔާ ދައްކަންޖެހޭނެއެވެ. މި އުސޫލު އެކުލަވައިލުމުން އެމްކިޔުއޭގެ ލިޔުންތަކުގެ އެޓެސްޓޭޝަން ޚިދުމަތް ލިބޭނީ އެ އޮތޯރިޓީންނެވެ.
ކޮމެންޓު ފޮނުވާ