ކުރީގެ ރައީސުންނާއި މަޖިލީސް މެންބަރުންގެ އިނާޔަތްތައް ކުޑަކުރުމަށް ސަރުކާރުން ނިންމައިފި

ކުރީގެ ރައީސުންނާއި ރައްޔިތުންގެ މަޖިލީހުގެ މެންބަރުކަން ކޮށްފައިވާ ފަރާތްތަކަށް ގާނޫނުތަކުން ލިބިދޭ ބައެއް އިނާޔަތްތައް އުނިކުރުމަށް ގާނޫނުތައް އިސްލާހުކުރަން ރައްޔިތުންގެ މަޖިލީހަށް ހުށަހެޅުމަށް ސަރުކާރުން ނިންމައިފައިވާކަން ރައީސް ޑރ. މުޙައްމަދު މުއިއްޒު މިއަދު އެކްސްގައި ކުރެއްވި ޕޯސްޓެއްގައި އިއުލާންކުރައްވައިފިއެވެ.

މި ނިންމުން އިއުލާންކުރެއްވުމުގެ ކުރިން، މިދިޔަ ހަފުތާގެ ބަންދު ދުވަސްތަކުގައި ޕީއެންސީގެ މަޖިލީސް މެންބަރުންގެ ވަޓްސްއެޕް ގްރޫޕަށް ރައީސް މުއިއްޒު ފޮނުއްވި މެސެޖެއްގައި ވަނީ، ކުރީގެ މެންބަރުންނާއި ރައީސުންނަށް ދެމުންދާ އިނާޔަތްތައް މަދުކުރަން ފެނިވަޑައިގަންނަވާ ކަމަށާއި، އެއީ ރައްޔިތުން އެދޭ ކަމެއް ކަމަށް ވިދާޅުވެފައެވެ.

ރައީސްގެ މި ހުށަހެޅުމަށް ޕީއެންސީގެ މެންބަރުންގެ ތެރެއިން ދެކޮޅު ހެއްދެވީ މަހިބަދޫ ދާއިރާގެ މެންބަރު އަހުމަދު ތާރިގުއާއި މާފަންނު ދެކުނު ދާއިރާގެ މެންބަރު އަބްދުﷲ ރިފާއު އެކަންޏެވެ. ނަމަވެސް ގިނަ މެންބަރުން ވަނީ މި ހުށަހެޅުމަށް ތާއީދުކުރައްވާފައެވެ. ބައެއް މެންބަރުން ވަނީ ފަނޑިޔާރުންނާއި ސަލާމަތީ ޚިދުމަތްތަކަށް ކުރާ ޚަރަދު ވެސް ކުޑަކުރަންޖެހޭނެ ކަމަށް ފާހަގަކުރައްވާފައެވެ.

މި ޚަބަރު ފެތުރުމާއެކު މީސްމީޑިއާގައި ގިނަ ބަޔަކު ވަނީ ރައީސްގެ ނިންމުމަށް މަރުޙަބާ ކިޔައި، އެއީ ވަރަށް އަވަހަށް ކުރަންޖެހޭ ކަމެއް ކަމަށް ފާހަގަކޮށްފައެވެ. ބައެއް މީހުން ގޮވާލަނީ އިނާޔަތްތައް ކުޑަކުރުމުގެ ބަދަލުގައި މުޅިން ކަނޑާލަން ވެސް އެވެ. މީގެ އިތުރުން ފުލުހުންނާއި ސިފައިންނަށް ދޭ އިނާޔަތްތަކާއި، ފަނޑިޔާރުންނަށް ދޭ އިނާޔަތްތައް ކަނޑާލުމަށާއި، ސަރުކާރުގެ ސިޔާސީ މަގާމުތަކުގައި ތިބި މީހުން ވަކިކުރުމަށް ވެސް އެދި ގޮވާލުންތައް ކުރަމުންދެއެވެ.

މިހާރު ދައުރުވާ މަޢުލޫމާތުތައް ދައްކާ ގޮތުގައި 2014 ވަނަ އަހަރުން ފެށިގެން ކުރީގެ މެންބަރުންގެ ސިއްހީ އިންޝުއަރެންސަށް 18.9 މިލިއަން ރުފިޔާ ޚަރަދުވެފައިވެއެވެ. 2013 ވަނަ އަހަރު ފެށުނު މި އިނާޔަތުގެ ދަށުން، އުމުރުން 55 އަހަރު ފުރޭ ކުރީގެ މެންބަރުންނަށް، އެއް ދައުރު ފުރިހަމަކޮށްފައިވާނަމަ މުސާރައިގެ 30 އިންސައްތަ އަދި ދެ ދައުރު ފުރިހަމަކޮށްފައިވާނަމަ 45 އިންސައްތަ ލިބެމުންދެއެވެ.

2009 ވަނަ އަހަރު ފެށުނު ކުރީގެ ރައީސުންގެ އިނާޔަތުގެ ދަށުން، އެއް ދައުރު ފުރިހަމަކުރި ރައީސަކަށް މަހަކު 50،000 ރުފިޔާ އަދި ދެ ދައުރު ފުރިހަމަކުރި ރައީސަކަށް 75،000 ރުފިޔާ ލިބެއެވެ. މީގެ އިތުރުން ދިރިއުޅުމުގެ އިނާޔަތުގެ ގޮތުގައި 50،000 ރުފިޔާއާއި އޮފީސް ހިންގުމަށް 175،000 ރުފިޔާ ވެސް ލިބެމުންދެއެވެ.

އިގުތިސާދީ ހާލަތު ދަށްވަމުންދާ މި ދަނޑިވަޅުގައި، ކުރީގެ ފަސް ރައީސުން ތިއްބެވުމުން ދައުލަތަށް ކުރަންޖެހޭ ޚަރަދު ބޮޑުކަމުން، މި އިނާޔަތްތަކަކީ އިސްރާފެއް ކަމަށް ގިނަ ބަޔަކު ދެކެމުންދެއެވެ. ޕީއެންސީގެ 75 މެންބަރުން މަޖިލީހުގައި ތިއްބެވުމުން، މި ބަދަލުތައް ގެނައުމަށް ބޭނުންވާ އަޣުލަބިއްޔަތު ލިބިފައިވާކަން ފާހަގަކުރެވެއެވެ.