ސިވިލް ސާވިސް މުވައްޒަފުންގެ ޚިދުމަތުގެ މުއްދަތު ގުނުމާ ގުޅޭ މުހިންމު ބަދަލެއް އައިސްފިއެވެ.
ކޮމިޝަނުން މިއަދު ނެރުނު އިއުލާނެއްގައި ބުނެފައިވަނީ، ވަޒީފާއިން ރިޓަޔާކުރާ މުވައްޒަފުންގެ ޚިދުމަތުގެ މުއްދަތު ގުނުމުގައި ދައުލަތުގެ އެހެން އިދާރާތަކާއި ސަރުކާރުގެ މައި ހިއްސާ އޮންނަ ކުންފުނިތަކުގައި މަސައްކަތްކުރި މުއްދަތު ހިމެނުމަށް ކުރިން ނިންމި ނިންމުން ބާތިލުކޮށްފައިވާ ކަމަށެވެ. މި ނިންމުން ބާތިލުކުރީ ސަރުކާރުގެ ކަމާ ގުޅޭ އިދާރާތަކާ މަޝްވަރާކުރުމަށްފަހު ކަމަށް ކޮމިޝަނުން ބުނެއެވެ. ނަމަވެސް މި ބަދަލު ގެނައުމުގެ ތަފުސީލު ސަބަބުތައް ހާމަކޮށްފައެއް ނުވެއެވެ.
ކުރިން ސީއެސްސީން ނިންމާފައިވަނީ، ސިވިލް ސާވިސް މުވައްޒަފުން ރިޓަޔާކުރާއިރު އެ މީހުންގެ ޚިދުމަތުގެ މުއްދަތު ބަލާއިރު، ސިވިލް ސާވިސްގެ އިތުރުން ދައުލަތުގެ އެހެން މުއައްސަސާތަކާއި ސަރުކާރު ހިއްސާވާ ކުންފުނިތަކުގައި ވަޒީފާ އަދާކުރި މުއްދަތު ވެސް ހިމަނާގޮތަށެވެ. މި ގޮތަށް ވަޒީފާގެ ރިކޯޑު އޮތް މުވައްޒަފުންނަށް އެ މަޢުލޫމާތު ތަޖުރިބާގެ ބަޔަށް އަޕްޑޭޓްކުރުމަށް ވެސް ކޮމިޝަނުން އެދިފައިވެއެވެ.
ރައީސުލްޖުމްހޫރިއްޔާ މިއަދު ވަނީ ސިވިލް ސާވިސް ކޮމިޝަނަށް 3 މެމްބަރަކު އައްޔަން ކުރައްވާފައެވެ. މިއަދު އައްޔަންކުރެއްވީ، ކޮމިޝަންގެ ކުރީގެ ރައީސް މުހައްމަދު ނާސިހާއި، ޑރ. ޙުސައިން ފާއިޒާއި، ޑރ. ދީބާ މޫސާއެވެ.
ސީއެސްސީގެ މެންބަރުންގެ ތެރެއިން ނާސިހާއި މުހައްމަދު ފަރުސަތާއި ފާތިމަތު ޝަރީފްގެ މެންބަރުކަން މި މަހުގެ 3 ވަނަ ދުވަހު ހަމަވުމުން، އާ މެންބަރުން ހޯދުމަށް ހުޅުވާލި ފުރުސަތުގައި ކުރިމަތިލި ފަރާތްތަކުގެ ތެރެއިން 6 ނަމެއް ރައީސުލްޖުމްހޫރިއްޔާ މަޖިލީހަށް ފޮނުއްވާފައިވަނީ މި މަހުގެ 17 ވަނަ ދުވަހުއެވެ. އޭގެ ތެރެއިން މިއަދު އައްޔަންކުރެއްވީ މަތީގައި ދެންނެވި ތިން ބޭފުޅުންނެވެ.
ސިވިލް ސާވިސްގެ ޚިދުމަތުގެ މުއްދަތު ގުނުމުގެ ސިޔާސަތު ބަދަލުވުމުން، އެކި ސަރުކާރު ކުންފުނިތަކާއި މުއައްސަސާތަކުގައި މަސައްކަތްކޮށް، ފަހުން ސިވިލް ސާވިސްއަށް ބަދަލުވި މުވައްޒަފުންނަށް އޭގެ އަސަރު ކުރާނެ ކަމަށް ބެލެވެއެވެ.
ކޮމެންޓު ފޮނުވާ