ކުރިއަށް އޮތް ދެ ދުވަހުގެ ތެރޭގައި ރާއްޖޭގެ އުތުރާއި މެދުރާއްޖެތެރޭގެ އަތޮޅުތަކަށް ވައި ގަދަވެ، ކަނޑުތައް ގަދަވާނެ ކަމަށް މޫސުމާ ބެހޭ ޤައުމީ އިދާރާ، މެޓް އޮފީހުން އިންޒާރު ދީފިއެވެ. މި ހާލަތާ ގުޅިގެން އުތުރުގެ އަތޮޅުތަކަށް ވައިޓް އެލާޓެއް ނެރެ، ކަނޑު ދަތުރުފަތުރުކުރާ ފަރާތްތަކަށް ޚާއްޞަ ސަމާލުކަމެއް ދިނުމަށް އެ އިދާރާއިން ވަނީ އިލްތިމާސްކޮށްފައެވެ.
މެޓް އޮފީހުން ނެރުނު ވައިޓް އެލާޓުގައި ފާހަގަކޮށްފައިވާ ގޮތުގައި، މިއަދު ހެނދުނު 7:00 އިން މެންދުރުފަހު 1:00 އާ ދެމެދު އުތުރުގެ އަތޮޅުތަކަށް ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައި ޖެހޭނެއެވެ. ޚާއްޞަކޮށް ވިލާގަނޑުގައި ވައިގެ ބާރުމިން ގަޑިއަކު 40 މޭލަށް އަރައި، ކަނޑުތައް ވަރަށް ބޮޑަށް ގަދަވާނެ ކަމަށް ލަފާކުރެވެއެވެ.
އެ އިދާރާއިން ދީފައިވާ މަޢުލޫމާތުގައި ބުނެފައިވާ ގޮތުގައި، ކުރިއަށް އޮތް 24 ގަޑިއިރުގެ ތެރޭގައި އެންމެ ދެކުނުގެ އަތޮޅުތަކަށް ކެރީގެ އަސަރު ކުރާނެ އިރު، ރާއްޖޭގެ އެހެން ސަރަޙައްދުތަކަށް ވިއްސާރަވެ ގުގުރުމުގެ ފުރުޞަތު އޮތް ކަމަށް ވަނީ ފާހަގަކޮށްފައެވެ. މިރޭން ފެށިގެން މެދުރާއްޖެތެރެއާއި އުތުރުގެ އަތޮޅުތަކަށް ބޯކޮށް ވާރޭވެހިދާނެ ކަމަށްވެސް މެޓުން ވަނީ އަންގާފައެވެ.
ފާއިތުވި 24 ގަޑިއިރުގެ މޫސުމީ ރިކޯޑުތައް ބަލާއިރު، އެންމެ ގިނައިން ވާރޭވެހިފައިވަނީ ކ. ދިއްފުއްޓަށް ކަމަށާއި، އެ ރަށަށް 10.9 މިލިމީޓަރުގެ ވާރޭ ވެހިފައިވާ ކަމަށް މެޓުން ހާމަކުރިއެވެ.
މީގެ އިތުރުން، ހުޅަނގާއި ހުޅަނގު ދެކުނު އަތޮޅުތަކަށް ގަޑިއަކު 7 މޭލާއި 15 މޭލާ ދެމެދުގެ ބާރުމިނުގައި ވައި ޖެހޭނެ އިރު، ރާއްޖޭގެ އެހެން ސަރަޙައްދުތަކަށް ގަޑިއަކު 13 މޭލާއި 20 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް މެޓް އޮފީހުން ލަފާކުރެއެވެ.
މޫސުން ގޯސްވެ ކަނޑުތައް ގަދަވާނެތީ، ކަނޑު ދަތުރުފަތުރުކުރާ އެންމެހާ ފަރާތްތަކުން އިތުރު ސަމާލުކަމެއް ދެއްވައި، ސަލާމަތީ ފިޔަވަޅުތައް އެޅުމަށް މޫސުމާ ބެހޭ ޤައުމީ އިދާރާއިން ވަނީ ވަރަށް ބޮޑަށް އިލްތިމާސްކޮށްފައެވެ.
ކޮމެންޓު ފޮނުވާ