މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން ޗެނަލް 13 އާ ދެކޮޅަށް ހަރުކަށި ފިޔަވަޅު އަޅާނެ ކަމުގެ އިންޒާރު ދީފިއެވެ. މިއީ ބްރޯޑްކޮމްގެ އަމުރުތަކާ އެއްގޮތަށް ޗެނަލް 13 އިން އަމަލުނުކުރާތީ ދިން އިންޒާރެކެވެ.
މި މައްސަލައިގެ ފެށުން ގުޅިފައިވަނީ ޗެނަލް 13 އިން މިއަހަރުގެ ޖެނުއަރީ 30 ވަނަ ދުވަހު އިރާދަން ހަބަރުގައި ގެނެސްދިން ރިޕޯޓަކާއެވެ. އެ ރިޕޯޓުގައި ކޮންޓެންޓް ބްރޯޑްކާސްޓްކުރުމުގެ ކޯޑް އޮފް ޕްރެކްޓިސްގެ ގިނަ ހަމަތަކަކާ ހިލާފުވެފައިވާކަން ބްރޯޑްކޮމްގެ ތަހުގީގުން ސާބިތުވެފައިވެއެވެ.
ބްރޯޑްކޮމްގެ ތަހުގީގު ނިމުމުން، މިމަހުގެ 13 ވަނަ ދުވަހު ނެރުނު ބަޔާނުގައި ޗެނަލް 13 އަށް ދެ އަމުރެއް ކޮށްފައިވެއެވެ. ފުރަތަމަ އަމުރަކީ މައާފަށް އެދޭ ބަޔާނެއް ނެރެ، މިމަހުގެ 19 ގެ ކުރިން ރޭގަނޑު 8:00 އާއި 9:00 އާ ދެމެދު ބްރޯޑްކާސްޓްކުރުމެވެ. ދެވަނަ އަމުރަކީ މިރޭ 8:00 އިން 9:00 އަށް ޗެނަލް 13 ގެ ޕްރޮގްރާމް ޝެޑިއުލް މެދުކަނޑާލުމެވެ.
އެހެންނަމަވެސް ޗެނަލް 13 އިން މި ދެ އަމުރުގެ ތެރެއިން އެއްވެސް އަމުރަކާ އެއްގޮތަށް އަމަލުކޮށްފައެއް ނުވެއެވެ. ޕްރޮގްރާމް ޝެޑިއުލް މެދުކަނޑާލުމުގެ ބަދަލުގައި، ކުރީގެ ރައީސް އަބްދުﷲ ޔާމީން އަބްދުލްޤައްޔޫމް އިސްވެ އުފައްދަވާފައިވާ ޕީޕަލްސް ނޭޝަނަލް ފްރަންޓް (ޕީއެންއެފް) ގެ ހަރަކާތެއް މިރޭ ލައިވްކޮށް ގެންދިޔައެވެ.
ބްރޯޑްކޮމްގެ އަމުރުތަކާ ހިލާފުވުމުން، އެ ކޮމިޝަނުން މިރޭ ވަނީ ކޮމިޝަންގެ ގާނޫނީ ޒިންމާ އަދާކުރުމަށް ހުރަސްއެޅޭ ކަމަށް ފެނިއްޖެ ހިނދެއްގައި، ޗެނަލް 13 އާ ދެކޮޅަށް ހަރުކަށި ފިޔަވަޅު އަޅާނެ ކަމުގެ އިންޒާރު ދީފައެވެ.
ބްރޯޑްކާސްޓްކުރުމުގެ ގާނޫނުގެ ދަށުން، ލައިސަންސް ދޫކޮށްފައިވާ ފަރާތަކުން ގާނޫނާއި ގަވާއިދާ ހިލާފުވެ، އެކަން ރަނގަޅުކުރުމަށް އެންގުމުންވެސް ރަނގަޅުނުކޮށްފި ނަމަ، ޕްރޮގްރާމް ޝެޑިއުލުގެ ބައެއް ވަގުތީގޮތުން މެދުކަނޑާލުމުގެ އިހުތިޔާރު ބްރޯޑްކޮމަށް ލިބިގެންވެއެވެ. އެހެންކަމުން ޗެނަލް 13 އާ ދެކޮޅަށް އިތުރު ފިޔަވަޅުތައް އެޅުމުގެ ފުރުސަތު އޮތް ނަމަވެސް، އެފަދަ ފިޔަވަޅެއް އަޅާނެ ކަމެއް އަދި ނިންމައިފައެއް ނުވެއެވެ.
ކޮމެންޓު ފޮނުވާ