ހއ. ކެލާ ފަޅުގައި ޓޫރިސްޓް ރިސޯޓް ތަރައްގީކުރުމަށް ޓޫރިޒަމް މިނިސްޓްރީން އިތުރު ލުއިތަކާއެކު އަލުން ފުރުޞަތު ހުޅުވާލުމަށް ނިންމައިފިއެވެ. މިނިންމުމާއެކު، މީގެ ތިން މަސް ކުރިން ކުރި އިއުލާނު ވަނީ ބާތިލުކޮށްފައެވެ.
ކެލާ ފަޅުގައި ދެ ޓޫރިސްޓް ރިސޯޓެއް ތަރައްގީކުރުމަށް ބަޔަކު ހޯދުމުގެ ގޮތުން މިނިސްޓްރީން ކުރި އިއުލާނުގެ ބިޑް މުއްދަތު ހަމަވެފައިވާއިރު، ފަތުރުވެރިކަން ތަރައްގީވެފައިނުވާ އަތޮޅުތަކުގައި މި ސިނާއަތް ފުޅާކުރުމަށް ސަރުކާރުން އަޅާ ފިޔަވަޅުތަކުގެ ތެރެއިން މި މަޝްރޫއަށް ލުއިތަކެއް ދިނުމަށް ނިންމައިފިކަމަށް މިނިސްޓްރީން ބުނެއެވެ.
ރައީސް ޑރ. މުހައްމަދު މުއިއްޒުގެ ބޮޑު ވައުދުފުޅެއްގެ ގޮތުގައި ކެލާ ފަޅުގައި ދެ ރިސޯޓް ތަރައްގީކުރުން ހިމެނެއެވެ. ކުރިން ކުރި އިއުލާނުގައި ފަޅުތެރެއިން 156.2 ހެކްޓަރުގެ ސަރަހައްދަކާއި 169.3 ހެކްޓަރުގެ ސަރަހައްދެއް ބީލަމުގެ އުސޫލުން ދޫކުރުމަށް ނިންމިފައިވެއެވެ.
ފަތުރުވެރިކަން ތަރައްގީވެފައިނުވާ އަތޮޅުތަކުގައި މި ސިނާއަތް ކުރިއެރުވުމަށް ސަރުކާރުން އަޅަމުންދާ ފިޔަވަޅުތަކުގެ ތެރޭގައި ހއ.، ހދ.، ށ.، ތ.، ލ. އަދި އައްޑޫގައި ރިސޯޓު ތަރައްގީކުރަން ބޭނުންވާ ފަރާތްތަކަށް 24 މަހުގެ މުއްދަތަކަށް ލުއިތަކެއް ދިނުން ހިމެނެއެވެ. މީގެ އިތުރުން ހަލާލް ޓޫރިޒަމް ރާއްޖެއަށް ތައާރަފްކޮށް ފަތުރުވެރިކަން ތަރައްގީކުރަން އިންވެސްޓްކުރާ ފަރާތްތަކަށް ފަސޭހަތަކެއް ހޯދައިދިނުމަށް ވެސް ސަރުކާރުން ނިންމައިފައިވެއެވެ.
ކެލާ ފަޅުގައި ރިސޯޓް ތަރައްގީކުރުމަށް އަލުން ހުޅުވާލާ ފުރުޞަތުގައި ހިމެނޭ ލުއިތަކާ ބެހޭ ތަފްސީލު ޓޫރިޒަމް މިނިސްޓްރީން އަވަހަށް އާންމުކުރާނެ ކަމަށް ބެލެވެއެވެ.
ކޮމެންޓު ފޮނުވާ