ރާއްޖޭގެ އަތޮޅުތަކަށް އާރްޓީއެލް (ރާއްޖޭ ޓްރާންސްޕޯޓް ލިންކް) މެދުވެރިކޮށް ފޯރުކޮށްދޭ ދަތުރުފަތުރުގެ ޚިދުމަތުގައި ބެކަޕް އުޅަނދުތައް ނެތުމުގެ ސަބަބުން ގޮންޖެހުންތަކާ ކުރިމަތިވަމުންދާކަމަށް ޓްރާންސްޕޯޓް މިނިސްޓަރ މުޙައްމަދު އަމީން ފާހަގަކުރައްވައިފިއެވެ.
ދިވެހިރާއްޖޭގެ އަޑުގެ "އަހާށޭ ބުނާނަން" ޕްރޮގްރާމުގައި ވާހަކަދައްކަވަމުން މިނިސްޓަރު ވިދާޅުވީ، އުޅަނދުތަކުގެ މަރާމާތާއި ބެލެހެއްޓުމުގެ މަސައްކަތްތަކަށް ޚިދުމަތުން އުޅަނދުތައް ވަކިކުރަންޖެހޭ ވަގުތުތަކުގައި ބަދަލު އުޅަނދުތައް ބޭނުންކުރުމަކީ ވަރަށް މުހިންމު ކަމެއްކަމަށެވެ. އެހެންނަމަވެސް މިނިސްޓަރު ޔަޤީންކަން ދެއްވީ، އެއްވެސް ދަތުރެއް މެދުކަނޑާލައިގެން ނުވާނެކަމަށާއި، އަތޮޅުތަކަށް ދެމުންގެންދާ ޚިދުމަތަށް ހުއްޓުމެއް ނާންނާނެކަމަށެވެ.
އާރްޓީއެލްގެ ޚިދުމަތް ފުޅާކުރުމުގެ ޕްލޭން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން 2027 ގެ ބަދަލުގައި 2025 ގައި ފުރިހަމަކުރުމަށް ހަމަޖެހިފައިވާކަމަށް މިނިސްޓަރު ވިދާޅުވިއެވެ. ފާއިތުވި އަހަރު ނޫނު އަތޮޅުގައި މި ޚިދުމަތް ފަށާފައިވާއިރު، މި އަހަރުގެ ޖޫން މަހު ރާ އަތޮޅުގައާއި ޖުލައި މަހު ބާ އަތޮޅުގައި ޚިދުމަތް ފެށުމަށް ހަމަޖެހިފައިވާކަމަށްވެސް މިނިސްޓަރު ހާމަކުރެއްވިއެވެ.
އިތުރު އަތޮޅުތަކަށް އާރްޓީއެލްގެ ޚިދުމަތް ފޯރުކޮށްދިނުމަށްޓަކައި ބޭނުންވާ އުޅަނދުތައް ތައްޔާރުކުރުމުގެ މަސައްކަތް މިހާރު ކުރިއަށްދަމުންދާކަމަށްވެސް ޓްރާންސްޕޯޓް މިނިސްޓަރ މުޙައްމަދު އަމީން ވަނީ ވިދާޅުވެފައެވެ.
ކޮމެންޓު ފޮނުވާ