ސްރީ ލަންކާގެ ޓެކްނިކަލް އެންޑް ވޮކޭޝަނަލް އެޑިއުކޭޝަން އެންޑް ޓްރެއިނިންގ (ޓީވެޓް) އޮތޯރިޓީން މަތީ ތައުލީމުދޭ ބައެއް މުއައްސަސާތަކަށް ދޫކޮށްފައިވާ ހުއްދަ ހިފަހައްޓައި، އެ މަރުކަޒުތައް ސަސްޕެންޑް ކޮށްފައިވާ ކަމަށް މޯލްޑިވްސް ކުއަލިފިކޭޝަންސް އޮތޯރިޓީ (އެމްކިއުއޭ) އިން ރާއްޖޭގެ ދަރިވަރުންނަށް އަންގައިފިއެވެ.
މިގޮތުން ސަސްޕެންޑް ކޮށްފައިވާ މަރުކަޒުތަކުގެ ތެރޭގައި ގިނަ އަދަދެއްގެ ދިވެހި ދަރިވަރުން ކިޔަވަމުންދާ މެޓްރޮޕޮލިޓަން ކޮލެޖާއި އީސޮފްޓް ކޮލެޖް ހިމެނެއެވެ. މި ދެ ކޮލެޖްގެ ހުރިހާ ކެމްޕަސްތަކަށް ލަންކާ ސަރުކާރުން ދޫކޮށްފައިވާ ހުއްދަ ވަގުތީ ގޮތުން ހިފަހައްޓާފައިވާ ކަމަށް އެމްކިއުއޭގެ ނޯޓިސްގައި ބަޔާންކޮށްފައިވެއެވެ.
މި ހާލަތާ ގުޅިގެން އެމްކިއުއޭ އިން ވަނީ، މި ދެ މަރުކަޒުގައި މިހާރު ތައުލީމު ހާސިލުކުރަމުންދާ ދަރިވަރުން ވީ އެންމެ އަވަހަކަށް އެ އޮތޯރިޓީގެ އީމެއިލް އެޑްރެސް [email protected] އަށް ގުޅުމަށް އިލްތިމާސްކޮށްފައެވެ. މިއީ ދަރިވަރުންގެ ތައުލީމީ ހާލަތު ދެނެގަނެ، އެކަށީގެންވާ ލަފާ ދޭނެ ކަމަށް އެމްކިއުއޭ އިން ބުނެއެވެ.
އަދި މިހާރުން މިހާރަށް މި ދެ ކޮލެޖަށް އައު ދަރިވަރުން ރަޖިސްޓްރީ ނުވުމަށާއި، މި ކޮލެޖްތަކުގެ އެއްވެސް ޕްރޮގްރާމަކަށް އެންރޯލް ނުވުމަށް އެމްކިއުއޭ އިން ވަނީ ވަރުގަދަ ނަސޭހަތެއް ދީފައެވެ. އެމްކިއުއޭ އިން ފާހަގަކޮށްފައިވާ ގޮތުގައި، އެ އޮތޯރިޓީން ގަބޫލުނުކުރާ މަރުކަޒަކުން ސަނަދު ހާސިލުކޮށްފި ނަމަ، އޭގެ ސަބަބުން ދަރިވަރަށް ކުރިމަތިވާ އެންމެހައި ގެއްލުމުގެ ޒިންމާ އެމްކިއުއޭ އިން ނުނަގާނެއެވެ.
މި މައްސަލައަކީ ރާއްޖެއިން ބޭރުގައި ތައުލީމު ހާސިލުކުރާ ދިވެހި ދަރިވަރުންނަށް ކުރިމަތިވެފައިވާ ވަރަށް ބޮޑު ގޮންޖެހުމެކެވެ. ޚާއްސަކޮށް މި ދެ ކޮލެޖްގައި ކިޔަވަމުންދާ ދަރިވަރުންގެ މުސްތަގްބަލާ މެދު ސުވާލު އުފެދިފައިވާ ހާލަތެއްގައި، އެމްކިއުއޭގެ ލަފާއަށް އަމަލުކުރުމަކީ ވަރަށް މުހިންމު ކަމެކެވެ.
ކޮމެންޓު ފޮނުވާ