އަންނަ ހޯމައިން ފެށިގެން ރާއްޖޭގެ މޫސުން ވަރަށް ގޯސްވާނެ

މޫސުން ގޯސްވާއިރު ރައްކާތެރިވުމަށް މެޓްގެ ސާމަން އިންޒާރު

އަންނަ ހޯމަ ދުވަހުން ފެށިގެން ރާއްޖޭގެ މޫސުން ވަރަށް ގޯސްވާނެ ކަމަށް ލަފާކޮށް، މޯލްޑިވްސް މީޓިއޮރޮލޮޖިކަލް ސަރވިސް (މެޓް އޮފީސް) އިން ރައްކާތެރިކަމުގެ ފިޔަވަޅުތައް އެޅުމަށް އިލްތިމާސްކޮށްފައެވެ.

މިއަދު މެޓް އޮފީހުން ނެރުނު ބަޔާނުގައި ވިދާޅުވީ، ހޯމަ ދުވަހުން ފެށިގެން ކުރިއަށް އޮތް ފަސް ދުވަހުގެ ތެރޭގައި ރާއްޖޭގެ ސަރަހައްދުގައި ކަނޑުތައް ވަރަށް ގަދަވެ، ވައި ބާރުވެ، ގިނަ ވިއްސާރަ ކުރާނެ ކަމަށެވެ. މި ހާލަތުގައި އާންމު ގޮތެއްގައި ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް އަންދާޒާކުރެވޭ ކަމަށާއި، ވިލާގަނޑުގައި ގަޑިއަކު 40 މޭލާއި 45 މޭލާ ދެމެދުގެ ބާރުމިނުގައި ވައި ޖެހުމުގެ ފުރުސަތު އޮތް ކަމަށް މެޓުން ބުންޏެވެ.

މީގެ އިތުރުން، ދިޔަވަރު އެންމެ ބޮޑުވާ ގަޑިތަކުގައި ބައެއް ރަށްރަށަށް އުދައިގެ އަސަރު ކުރުމުގެ ފުރުސަތު އޮތް ކަމަށް ވެސް މެޓް އޮފީހުން ލަފާދީފައިވެއެވެ. އުދައިގެ އަސަރުކުރާ ރަށްރަށުގައި ތިބޭ ފަރާތްތަކުން ވަރަށް ބޮޑަށް ސަމާލުވުމަށް މެޓުން އިލްތިމާސްކުރެއެވެ.

އީދު ބަންދަށް ރާއްޖޭގެ އެކި ކަންކޮޅުތަކަށް ގިނަ ބަޔަކު ދަތުރުކޮށްފައިވާއިރު، އީދު ޗުއްޓީ ނިމޭނީ ހޯމަ ދުވަހުއެވެ. މި ގޮތުން ކަނޑުދަތުރުކުރާ ފަރާތްތަކުން ވަރަށް ބޮޑަށް ސަމާލުވުމަށާއި، ކުދި އުޅަނދުފަހަރުގައި ދަތުރުކުރާނަމަ މޫސުމަށް ރިޢާޔަތްކޮށް ދަތުރުތައް ފަސްކުރުމަށް މެޓް އޮފީހުން ވަނީ އިލްތިމާސްކޮށްފައެވެ. ހާއްސަކޮށް ފަޅުވެރިން އަދި މަސްވެރިންނަށް މި އިންޒާރަށް ސަމާލުކަން ދިނުމަށް މެޓުން ގޮވާލައެވެ.