ފެނަކައިން އަގުހެޔޮ ރޭޓްގައި ގޭ ބިސީތަކަށް ބިލްކުރަން ފަށައިފި

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވި ގޮތުގެ މަތިން ޖޫން މަހުން ފެށިގެން ކަރަންޓް ބިލް ހެޔޮކުރުމުގެ މަސައްކަތް ފެނަކަ ކޯޕަރޭޝަނުން ފަށާފައިވާ ކަމަށް އެ ކުންފުނިން ހާމަކުރެއްވި އެވެ. މި ބަދަލުގެ ދަށުން މޭ މަހުގެ ކަރަންޓް ބިލަށް ވެސް އާ ޓެރިފް ރޭޓްތަކަށް ފެއްތުމަށް ނިންމާފައިވާ ކަމަށް ފެނަކައިން ވަނީ އިއުލާނުކޮށްފަ އެވެ.

ފެނަކައިން ބުނެފައިވަނީ މޭ މަހުގެ ކަރަންޓް ބިލަށް ފައިސާ ދައްކާފައިވާ ފަރާތްތަކަށް އިތުރަށް ދައްކާފައިވާ ފައިސާގެ ތެރެއިން ޖޫން މަހުގެ ބިލުން އުނިކޮށްދޭނެ ކަމަށެވެ. އަދި މޭ މަހުގެ ބިލަށް ފައިސާ ދައްކާފައި ނުވާ ފަރާތްތަކަށް ހެޔޮކުރެވުނު އަގުތަކުގައި އަލުން ބިލް ތައްޔާރުކޮށްދޭނެ ކަމަށް ވެސް ފެނަކައިން ބުނެފައިވެ އެވެ.

ރައީސުލްޖުމްހޫރިއްޔާ މިދިޔަ މަހުގެ 30 ވަނަ ދުވަހު ވިދާޅުވީ ހޫނު މޫސުމުގައި ކަރަންޓް ބޭނުންކުރުން އިތުރުވުމާ ގުޅިގެން ރައްޔިތުންނަށް ދިމާވާ ދަތިކަން ހައްލުކުރެއްވުމަށް ޓަކައި ޖޫން މަހުގެ 1 ވަނަ ދުވަހުން ފެށިގެން ގޭބިސީ ކެޓެގަރީގެ ކަރަންޓް އަގުތައް ދަށްކުރުމަށް ނިންމެވި ކަމަށެވެ. މި ނިންމެވުމާ ގުޅިގެން ކަމާބެހޭ އިދާރާތަކަށް ބަދަލުތައް ގެނައުމަށް އެންގެވި ކަމަށް ވެސް ރައީސުލްޖުމްހޫރިއްޔާ ވިދާޅުވި އެވެ.

އާ ޓެރިފް ރޭޓްތަކުގެ ދަށުން 100 ޔުނިޓާ ހަމައަށް ބޭނުންކުރާ ފަރާތްތަކުން ކުރިން ދައްކަމުން އައި 1.50 ރުފިޔާގެ ބަދަލުގައި 1.25 ރުފިޔާ ދައްކާނެ އެވެ. 100 އިން 200 ޔުނިޓާ ދެމެދު ބޭނުންކުރާ ފަރާތްތަކުން ކުރިން ދައްކި 1.70 ރުފިޔާގެ ބަދަލުގައި 1.50 ރުފިޔާ ދައްކާނެ އެވެ.

އެންމެ ބޮޑު ބަދަލެއް އައިސްފައި ވަނީ 201 އިން 400 ޔުނިޓާ ދެމެދު ބޭނުންކުރާ ފަރާތްތަކަށެވެ. މި ފަރާތްތަކުން ކުރިން ދައްކަމުން އައި 2.15 ރުފިޔާ އާއި 2.50 ރުފިޔާގެ ބަދަލުގައި އެއް ރޭޓެއް ކަމުގައިވާ 1.50 ރުފިޔާ ދައްކާނެ އެވެ.

401 އިން 500 ޔުނިޓާ ދެމެދު ބޭނުންކުރާ ފަރާތްތަކުން ކުރިން ދައްކި 2.95 ރުފިޔާގެ ބަދަލުގައި 2.66 ރުފިޔާ ދައްކާނެ އެވެ. 501 އިން 600 ޔުނިޓާ ދެމެދު ބޭނުންކުރާ ފަރާތްތަކުން ކުރިން ދައްކި 3.55 ރުފިޔާގެ ބަދަލުގައި 3.20 ރުފިޔާ ދައްކާނެ އެވެ. 600 ޔުނިޓަށް ވުރެ އިތުރަށް ބޭނުންކުރާ ފަރާތްތަކުން ކުރިން ދައްކި 4.25 ރުފިޔާގެ ބަދަލުގައި ދެން ދައްކާނީ 3.83 ރުފިޔާއެވެ.

ހޫނު މޫސުމުގައި އެއަރކޮންޑިޝަނަރ ފަދަ ކަރަންޓް ގިނައިން ބޭނުންކުރާ ތަކެތި ބޭނުންކުރުން އިތުރުވުމާ ގުޅިގެން ކަރަންޓް ބިލް ބޮޑުވުމަކީ ގިނަ ޢާއިލާތަކަށް ކުރިމަތިވާ ދަތިކަމެކެވެ. މި ދަތިކަން ހައްލުކުރުމަށް ކަރަންޓް އަގު ހެޔޮކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވާފައިވާ ވައުދެކެވެ. މި ބަދަލާއެކު ރައްޔިތުންނަށް ކަރަންޓް ޚަރަދު ކުޑަވެ، ދިރިއުޅުމުގެ ޚަރަދު ކުޑަކުރުމަށް މަގުފަހިވެގެންދާނެ އެވެ.