މޯލްޑިވްސް ކަސްޓަމްސް ސާވިސްއިން މިއަދު ވަނީ ވެލާނާ އިންޓަރނޭޝަނަލް އެއާޕޯޓުން 3.6 ކިލޯގްރާމްގެ މަސްތުވާތަކެތި އަތުލައިގަނެފައެވެ.
ކަސްޓަމްސްގެ މަޢުލޫމާތުގައިވާ ގޮތުން، މިތަކެތި ފެނިފައިވަނީ ލިބުނު އިންޓެލިޖެންސް މަޢުލޫމާތަކާ ގުޅިގެން މިރޭ ކުރިއަށް ގެންދިޔަ ޚާއްސަ އޮޕަރޭޝަނެއްގައެވެ. ވައިގެ މަގުން ރާއްޖެ ވެއްދުމަށް އުޅުނު ޝިޕްމެންޓެއް ބަލައި ފާސްކުރުމުގެ ތެރެއިން މި މަސްތުވާތަކެތި ފެނިފައިވާކަމަށް ކަސްޓަމްސްއިން ހާމަކުރެއެވެ.
އަތުލައިގަނެވުނު މަސްތުވާތަކެތީގެ ފުރަތަމަ ތަޙުލީލުތަކުން ދައްކާގޮތުގައި މިއީ މެތަމްފެޓަމައިން ކަމަށް ޝައްކުކުރެވެއެވެ. 3.6 ކިލޯގްރާމްގެ މި މަސްތުވާތަކެތީގެ މަގުމަތީ އަގު 7.2 މިލިއަން ރުފިޔާއަށް އަރާނެކަމަށް އަންދާޒާކުރެވޭކަމަށް ކަސްޓަމްސްއިން ބުނެއެވެ.
ވައިގެމަގުން ރާއްޖެއަށް އެތެރެކުރަން އުޅުނު 3.6 ކިލޯގެ މަސްތުވާތަކެތި ކަސްޓަމްސްއިން އަތުލައިގެންފި.
ބާވަތް: މެތަމްފެޓަމައިން
ބަރުދަން: 3.6 ކިލޯގްރާމް
ތާރީޚް: 22 މޭ 2025 pic.twitter.com/r8aYIOW9iD— Maldives Customs Service (@CustomsMv) May 22, 2025
މީގެ އިތުރުން، ކަސްޓަމްސްއިން ވަނީ ކުރިއަރ ޚިދުމަތް މެދުވެރިކޮށް ރާއްޖެ އެތެރެކުރަން އުޅުނު އެހެން ޕެކޭޖެއްގައި ފޮރުވައިގެން ގެނައި އެއް ކިލޯގްރާމްގެ މަސްތުވާތަކެތި ވެސް އަތުލައިގަނެފައެވެ. މި މަސްތުވާތަކެތީގެ އަގު 2.5 މިލިއަން ރުފިޔާ ހަމަވާނެކަމަށް ލަފާކުރެވެއެވެ.
ކަސްޓަމްސްއިން މި މައްސަލަތައް ތަޙުޤީޤުކުރަމުން ގެންދާއިރު، މަސްތުވާތަކެތީގެ ވިޔަފާރީގެ ތެރެއަށް ވަންނަން އުޅޭ ފަރާތްތަކާ ދެކޮޅަށް ފިޔަވަޅު އެޅުމަށް ދަނީ މަސައްކަތްކުރަމުންނެވެ.
ކޮމެންޓު ފޮނުވާ