ޣައްޒާގައި އަލުން ފެށިފައިވާ ހަމަލާތަކާ ގުޅިގެން އިންސާނީ އެހީތައް ފޯރުކޮށްދިނުމަށް ހުރަސްއަޅާނަމަ، އިޒްރޭލާ ދެކޮޅަށް ދަތިކުރުމުގެ ފިޔަވަޅުތައް އަޅާނެކަމުގެ އިންޒާރު އިނގިރޭސިވިލާތް، ފްރާންސް އަދި ކެނެޑާއިން ދީފިއެވެ.
އިހަށްދުވަހު ނެރުނު މި ތިން ގައުމުގެ ގުޅިފައިވާ ބަޔާނުގައި ބުނެފައިވަނީ، "އާންމު ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް އިޒްރޭލު ސަރުކާރުން ހުރަސްއެޅުމަކީ ބައިނަލްއަޤްވާމީ ޤާނޫނާ ޚިލާފު ޢަމަލެއް" ކަމަށެވެ. އަދި "ހުޅަނގު އައްސޭރީގައި [ޔަހޫދީން] އިތުރަށް އާބާދުކުރުމުގެ ކޮންމެ ޕްލޭނަކާ ދެކޮޅަށް… ދަތިކުރުމުގެ ފިޔަވަޅުތައް އެޅުމަށް ފަހެއް ނުޖެހޭނެ" ކަމަށްވެސް ބަޔާނުގައި ފާހަގަކޮށްފައިވެއެވެ.
ހުކުރު ދުވަހު އިޒްރޭލުން ޣައްޒާގައި އާ އޮޕަރޭޝަނެއް ފަށައިފައިވާކަން އިޢުލާންކުރުމަށްފަހު، ބޮޑުވަޒީރު ބެންޖަމިން ނަތަންޔާހޫ ވަނީ މުޅި ޣައްޒާ އިޒްރޭލުގެ ކޮންޓްރޯލްގެ ދަށަށް ގެންނާނެކަމަށް ބުނެފައެވެ. މިއާ ގުޅިގެން، ނަތަންޔާހޫ މި ތިން ގައުމުގެ ބަޔާނަށް ރައްދުދެމުން ބުނެފައިވަނީ އެއީ "އޮކްޓޫބަރު 7 ގެ ނަސްލު ނައްތާލުމުގެ ހަމަލާއަށް" ދެވޭ އިނާމެއްކަމަށާއި، މިފަދަ އިތުރު ހަމަލާތަކަށް ދަޢުވަތުދިނުން ކަމަށެވެ.
އިޒްރޭލުގެ ހިޞާރުގައި މިހާރުވެސް ކާބޯތަކެތި މަދުވެ، ބަނޑުހައިހޫނުކަން ޢާންމުވެފައިވާ ޣައްޒާގެ ހާލަތު މިހާރު އިތުރަށް ގޯސްވެދާނެކަމުގެ ބިރު ފާޅުކުރެވެއެވެ. މާޗް މަހުގެ 2 ވަނަ ދުވަހުން ފެށިގެން ކާނާއާއި ބޭސްފަދަ އަސާސީ ތަކެތި ޣައްޒާއަށް ވެއްދުން އިޒްރޭލުން އޮތީ މަނާކޮށްފައެވެ.
ޔޫކޭ، ފްރާންސް، އަދި ކެނެޑާގެ ބަޔާނުގައި އިތުރަށް ބުނެފައިވަނީ، ޓެރަރިޒަމާ ދެކޮޅަށް އަދި އަމިއްލަ ދިފާޢުގައި އިޒްރޭލުން ކުރާ ކަންކަމަށް ތާއީދުކުރި ނަމަވެސް، މިހާރު ހިނގަމުންދާ ޢަމަލުތަކަކީ ހާލަތާ އެއްވެސްގޮތަކުން ނުގުޅޭ، ނޭއްގާނީ ޢަމަލުތަކެއްކަމަށާއި، މިފަދަ ޢަމަލުތަކަށް އަޅާނުލާ ތިބެން ނުކެރޭނެކަމަށެވެ.
އޮކްޓޫބަރު 7، 2023 ގައި ހަމާސްއިން އިޒްރޭލަށް ދިން ހަމަލާއަށްފަހު، އިޒްރޭލުގެ ހަމަލާތަކުގައި މިހާތަނަށް 53,000 އަށްވުރެ ގިނަ ފަލަސްތީނުން ޝަހީދުވެފައިވާއިރު، ފާއިތުވި 24 ގަޑިއިރުގެ ތެރޭގައި އެކަނި 100 ވަރަކަށް މީހުން މަރުވެފައިވެއެވެ. ނަތަންޔާހޫ ބުނަމުންދަނީ، ހަނގުރާމައިގެ މަޤްޞަދަކީ ހަމާސްއިން ރަހީނުކޮށްފައިވާ އެންމެން މިނިވަންކުރުން ކަމަށާއި، އެ މަޤްޞަދު ހާސިލްވަންދެން ހަނގުރާމަ ކުރިއަށްދާނެކަމަށް ބުނެފައިވެއެވެ.
ކޮމެންޓު ފޮނުވާ