ރާއްޖޭގެ މޫސުމާއި ބެހޭ ގައުމީ އިދާރާއިން (މެޓް އޮފީސް) އިއުލާނުކޮށްފައިވާ ގޮތުގައި ކުރިޔަށް އޮތް ތިން ދުވަހު ރާއްޖޭގެ މޫސުން ގޯސްވާނެތީ، އާންމު ރައްޔިތުން މޫސުމަށް ސަމާލުވުމަށް އިލްތިމާސްކޮށްފިއެވެ.
މެޓް އޮފީހުގެ ނިއުސް ބަޔާނުގައި ފާހަގަކޮށްފައިވާ ގޮތުގައި، ރާއްޖޭގެ ސަރަހައްދުގައި ހުޅަނގު މޫސުމުގެ ބާރު ގަދަވަމުން އަންނާތީ، ރާއްޖޭގެ އެކި ހިސާބުތަކަށް ވިއްސާރަކޮށް، ބައެއް ރަށްރަށަށް ގުގުރުމާއެކު ބޯކޮށް ވާރޭވެހޭނެ ކަމަށް ލަފާކުރެވެއެވެ. ހަމައެހެންމެ، މި މުއްދަތުގައި ރާއްޖޭގެ ކަނޑުތައްވެސް ގަދަވާނެކަމަށް ބަޔާންކޮށް، ކަނޑުދަތުރުކުރާ އެންމެހާ ފަރާތްތަކުން މޫސުމަށް ސަމާލުވުމަށް އިދާރާއިން އިލްތިމާސްކޮށްފައިވެއެވެ.
މެޓް އޮފީހުގެ ބަޔާނުގައި ވާގޮތުން، މިއަހަރުގެ ހުޅަނގު މޫސުން ދެކުނުގެ އަތޮޅުތަކަށް މިދިޔަ ބުދަދުވަހު ފެށިފައިވެއެވެ. އިދާރާއިން މަޢުލޫމާތު ދެއްވާގޮތުގައި ރާއްޖޭގައި އޮންނަނީ ދެ މޫސުމެވެ. އެއީ އިރުވައި މޫސުން (ޖަނަވަރީއިން މާރިޗުގެ ނިޔަލަށް) އަދި ހުޅަނގު މޫސުން (މޭ މަހުން ނޮވެމްބަރުގެ ނިޔަލަށް) އެވެ.
މެޓް އޮފީހުން އިތުރަށް ހާމަކުރެއްވިގޮތުގައި، ހުޅަނގު މޫސުމުގެ އަސަރުތައް އާންމު ގޮތެއްގައި މޭ މަހުގެ ފުރަތަމަ ނުވަތަ ދެވަނަ ހަފްތާގެ ތެރޭގައި ދެކުނުގެ އަތޮޅުތަކަށް ފަށައެވެ. އޭގެފަހުން މި މޫސުމުގެ އަސަރު މެދު ރާއްޖެތެރެއަށް ފޯރައި، މޭ މަސް ނިމުމުގެ ކުރިން މުޅި ރާއްޖެއަށް ހުޅަނގު މޫސުން ފެށިގެންދެއެވެ.
މެޓް އޮފީހުން ހާމަކުރިގޮތުގައި، ހުޅަނގު މޫސުން ފެށުނު ކަމަށް ބަލަނީ ދެކުނުގެ އަތޮޅުތަކަށް 25 މިލިމީޓަރު ނުވަތަ އެއަށްވުރެ ގިނައިން ވާރޭވެހި، ވައިގެ މިސްރާބު ހުޅަނގު ދެކުނާއި ހުޅަނގާ ދެމެދު ހުރެ، ގަޑިއަކު 10 ނޯޓިކަލް މޭލަށްވުރެ ބާރު މިނުގައި ވައިޖެހި، މި ދެ ހާލަތު ވިދިވިދިގެން 2 ދުވަހަށް ނުވަތަ އެއަށްވުރެ ގިނަ ދުވަހު ދެމިގެންދާނަމައެވެ.
އިދާރާއިން މިދިޔަ 24 އަހަރު ރާއްޖޭގެ އުތުރާއި މެދު ރާއްޖެތެރެ އަދި ދެކުނުގެ އަތޮޅުތަކަށް ހުޅަނގު މޫސުން ފެށުނު ތާރީޚުތައް އާންމުކޮށްފައިވާކަން ފާހަގަކުރެވެއެވެ.
ކޮމެންޓު ފޮނުވާ