މާލެ، 7 މެއި 2025 – މާލޭ ސަރަޙައްދު ހިމެނޭގޮތަށް ރާއްޖޭގެ ބޮޑު ސަރަޙައްދަކަށް ބޯކޮށް ވާރޭވެހޭނެކަމަށް ލަފާކޮށް މޫސުމާބެހޭ ޤައުމީ އިދާރާ (މޯލްޑިވްސް މީޓިއޮރޮލޮޖިކަލް ސާވިސް) އިން މިއަދު ޔެލޯ އެލާޓެއް ނެރެފިއެވެ.
މި އެލާޓް ދޫކޮށްފައިވަނީ މިއަދު ހެނދުނު 6:30 އިން ފެށިގެން 11:30 އާ ހަމައަށް ރ. އަތޮޅުން ފެށިގެން އދ. އަތޮޅާ ހަމައަށެވެ. މެޓް އޮފީހުން މަޢުލޫމާތު ދެއްވިގޮތުގައި މި ސަރަޙައްދުތަކަށް ބޯކޮށް ވާރޭވެހުމުގެ އިތުރުން ގުގުރާނެކަމަށް ލަފާކުރެވެއެވެ.
މިއަދުގެ ފަތިހުން ފެށިގެން މާލެއަށް ދަނީ ހުއްޓުމެއްނެތި ވާރޭ ވެހެމުންނެވެ. އަދި ޔެލޯ އެލާޓް ނެރެފައިވާ އަތޮޅުތައް ފިޔަވައި ރާއްޖޭގެ އެހެނިހެން ސަރަޙައްދުތަކަށްވެސް މިއަދު ވިއްސާރަކުރުމާއެކު ގުގުރާނެކަމަށް މެޓް އޮފީހުން ލަފާކޮށްފައިވެއެވެ.
މިއަދުގެ މޫސުމާ ގުޅޭގޮތުން މެޓް އޮފީހުން ދެއްވި މަޢުލޫމާތުގައި ވިދާޅުވިގޮތުގައި ދެކުނާއި މެދުރާއްޖެތެރޭގެ އަތޮޅުތަކުގައި ވައިޖެހޭނީ ހުޅަނގު ދެކުނާއި ހުޅަނގުން ގަޑިއަކު 13 މޭލާއި 23 މޭލަށެވެ. އުތުރުގެ އަތޮޅުތަކުގައި ވައިޖެހޭނީ ހުޅަނގާއި ހުޅަނގު އުތުރުން 10 މޭލާއި 20 މޭލަށެވެ. ވިލާގަނޑުގައި ވައިޖެހޭނީ 40 މޭލުގެ ބާރުމިނުގައެވެ.
މީގެއިތުރުން މެދުރާއްޖެތެރެ އާއި ދެކުނުގައި ކަނޑުތައް ގަދަވާނެކަމަށާއި، އުތުރުގައި އާދައިގެ ވަރަކަށް ގަދަވެފައި، ވިލާގަނޑުގައި ކަނޑު ގަދަވާނެކަމަށްވެސް މޫސުމާބެހޭ އިދާރާއިން ހާމަކުރެއްވިއެވެ. ރާޅުގެ އުސްމިން މިއަދު ހުންނާނީ 4-7 ފޫޓުގައެވެ.
ކޮމެންޓު ފޮނުވާ