އެންޓި ކޮރަޕްޝަން ކޮމިޝަން (އޭސީސީ)އިން ފެނަކަ ކޯޕަރޭޝަން ލިމިޓެޑްގެ ޕެޓީކޭޝް ފައިސާ ނަހަމަގޮތުގައި ބޭނުންކޮށްފައިވާ މައްސަލައެއްގައި ދަޢުވާކޮށްދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް 10 އެޕްރީލް 2025 ގައި ފޮނުވައިފިއެވެ.
އޭސީސީގެ ތަޙްޤީޤަށް ހެކިލިބިފައިވާ ގޮތުގައި މި މައްސަލައަކީ ފެނަކައިގެ އައްޑޫ ސިޓީ، ހިތަދޫ ސެންޓްރަލް ޕަވަރ ސްޓޭޝަން (ސީޕީއެސް) ޕްރޮޖެކްޓަށް ދޫކޮށްފައިވާ ޕެޓީކޭޝް ފައިސާ، އެ ކުންފުނީގެ ގަވާއިދާ ޚިލާފަށް އަމިއްލަ ބޭނުންތަކަށް ބޭނުންކޮށްފައިވާ މައްސަލައެކެވެ.
މި މައްސަލައިގައި ތުހުމަތުކުރެވެނީ ފެނަކައިގެ ޕްރޮޖެކްޓްސް ޑިޕާޓްމަންޓުގެ ކުރީގެ ޑެޕިއުޓީ ޑިރެކްޓަރު އަޙްމަދު ސާތިޝް ސައީދު (ހަސީނީވިލާ، ސ.ފޭދޫ)، ކުރީގެ ސީނިއާ އިންޖިނިއަރު މުޙައްމަދު ޢާޞިދު (ނިރޮޅުމާގެ، ތ.ތިމަރަފުށި) އަދި ކުރީގެ ސުޕަވައިޒަރު ޙުސައިން އާސިރު (ފަޅޯމާގެ، ސ.ފޭދޫ) އަށެވެ. މި ތިން ފަރާތަށް ދަޢުވާކޮށްދިނުމަށް އެދި މިދިޔަ ބުރާސްފަތި ދުވަހު އޭސީސީން ވަނީ ޕީޖީ އޮފީހަށް ފޮނުވާފައެވެ.
އޭސީސީން ހުށަހަޅާފައިވަނީ، ކުށެއްކުރަން އެދުމުގެ ކުށުގެ ދަޢުވާއާއި، ކުށެއްކުރަން ރޭވުމުގެ ކުށުގެ ދަޢުވާއާއި، ރަސްމީ ހައިސިއްޔަތުގެ ނުފޫޒު ނަހަމަގޮތުގައި ބޭނުންކޮށްގެން މަންފާ ހޯދުމާއި ހޯދައިދިނުމުގެ ކުށުގެ ދަޢުވާގެ އިތުރުން ދައުލަތުގެ މުދަލާއި ފައިސާއަށް ޚިޔާނާތްތެރިވުމުގެ ކުށުގެ ދަޢުވާއެވެ.
އޭސީސީގެ ބަޔާނުގައި ބުނެފައިވާ ގޮތުން، މި މައްސަލައިގައި 623,208.80 ރުފިޔާ އަނބުރާ ހޯދުމަށް ވަނީ ފެނަކައަށް އަންގާފައެވެ. އަދި މި މައްސަލައިގައި ތުހުމަތުކުރެވޭ ފަރާތްތަކުން ފޯޖަރީގެ ޢަމަލުތަކެއް ހިންގާފައިވާކަމަށް ތަޙްޤީޤަށް ފާހަގަކުރެވޭތީ، އެކަން ތަޙްޤީޤުކޮށްދިނުމަށް ދިވެހި ފުލުހުންގެ ޚިދުމަތަށް ފޮނުވުމަށް ވެސް ވަނީ ނިންމާފައެވެ.
މިދިޔަ ސަރުކާރުގައި އެންމެ ގިނަ ކޮރަޕްޝަންގެ ތުހުމަތުކުރެވުނު ސަރުކާރު ކުންފުންޏަކީ ފެނަކައެވެ. މިގޮތުން، އޭސީސީން ބަލަމުންދާ މައްސަލައަކާ ގުޅިގެން މިދިޔަ އޮކްޓޫބަރު މަހު ވަނީ ފެނަކައިގެ ކުރީގެ މެނޭޖިންގ ޑިރެކްޓަރު އަޙްމަދު ސައީދު މުޙައްމަދުގެ ޕާސްޕޯޓު ހިފަހައްޓާފައެވެ. މީގެ އިތުރުން، މިދިޔަ ޑިސެމްބަރު މަހު ޕްރޮސެކިއުޓަރ ޖެނެރަލްގެ އޮފީހުން ވަނީ އޭނާގެ މައްޗަށް ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ކުށުގެ ދަޢުވާ ކޮށްފައެވެ.
އަދި މިދިޔަ އާދީއްތަ ދުވަހު، ފެނަކައިން އައިސްޕްލާންޓް ގަތުމުގައި ކޮރަޕްޝަން ހިންގި މައްސަލައެއްގައި އޭނާގެ މައްޗަށާއި ފެނަކައިގެ ކުރީގެ ޗީފް އެކައުންޓެންޓް މުޙައްމަދު މަސްއޫދުގެ މައްޗަށް ދަޢުވާކޮށްދިނުމަށް އެދި އޭސީސީން ވަނީ ޕީޖީ އޮފީހަށް ފޮނުވާފައެވެ.
ސައީދު ވަނީ އޭނާގެ މައްޗަށް ކޮށްފައިވާ ތުހުމަތުތަކަށް އިންކާރުކޮށްފައެވެ.
ކޮމެންޓު ފޮނުވާ