މާލެ (12 އޭޕްރިލް 2025) – މި އަހަރުގެ ފުރަތަމަ ތިން މަސްދުވަހުގެ ތެރޭގައި މުދަލު ޒަކާތުގެ ގޮތުގައި ދައުލަތަށް 34.7 މިލިއަން ރުފިޔާ ލިބިފައިވާކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން އާންމުކޮށްފައިވާ ތަފާސްހިސާބުތަކުން ދައްކައިފިއެވެ. މިއީ މިދިޔަ އަހަރުގެ ހަމަ މި މުއްދަތުގައި ލިބުނު 23.5 މިލިއަން ރުފިޔާއާ އަޅާބަލާއިރު 47.6 އިންސައްތައިގެ ކުރިއެރުމެކެވެ.
މިދިޔަ މާރިޗު މަހަށް އެކަނި ބަލާއިރު، މުދަލު ޒަކާތުގެ ގޮތުގައި 23.5 މިލިއަން ރުފިޔާ ލިބުނެވެ. މިއީ މިދިޔަ އަހަރުގެ ހަމަ އެ މަހު ލިބުނު 14.1 މިލިއަން ރުފިޔާއާ އަޅާބަލާއިރު 66.6 އިންސައްތައިގެ އިތުރުވުމެކެވެ.
ފާހަގަކޮށްލެވޭ ކަމަކީ މިދިޔަ އަހަރަކީ ރާއްޖޭގެ ތާރީޚުގައި މުދަލު ޒަކާތުގެ ގޮތުގައި ދައުލަތަށް އެންމެ ގިނަ އަދަދެއް ލިބުނު އަހަރެވެ. 2024 ވަނަ އަހަރު މުދަލު ޒަކާތުގެ ގޮތުގައި ޖުމުލަ 101.9 މިލިއަން ރުފިޔާ ލިބިފައިވެއެވެ. މިއީ 2023 ވަނަ އަހަރު ލިބުނު 90.2 މިލިއަން ރުފިޔާއަށްވުރެ 12.9 އިންސައްތަ އިތުރު އަދަދެކެވެ.
މި އަހަރުގެ ޖަނަވަރީ 22 ވަނަ ދުވަހުން ފެށިގެން މުދަލު ޒަކާތް ވާޖިބުވާ ނިޞާބަކީ 8,800.05 ރުފިޔާކަމަށް އިސްލާމިކް މިނިސްޓްރީން ވަނީ ކަނޑައަޅާފައެވެ. މުދަލު ޒަކާތުގެ ނިޞާބަކީ، މުދަލުގައި އެ މިންވަރެއް ހަމަވުމުން އެއިން މުދަލުގެ ޒަކާތް ދިނުން ވާޖިބުވާ އެންމެ މަދު މިންވަރެވެ.
ފައިސާއިން މުދަލު ޒަކާތް ދައްކާއިރު ފައިސާ އަގުކުރެވެނީ ރަން ނުވަތަ ރިހީގެ އަގަށް ބަލާފައެވެ. ރާއްޖޭގައި ނިޞާބު ކަނޑައަޅަނީ ރިހީގެ ނިޞާބުންނެވެ. ރާއްޖޭގައި ރިހީގެ އަގު ކަނޑައަޅަނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިންނެވެ.
ފާހަގަކޮށްލެވޭ ގޮތުގައި 2016 ވަނަ އަހަރުން ފެށިގެން މުދަލު ޒަކާތް ބަލައިގަތުމުގެ މަސައްކަތް ކުރަމުން އަންނަނީ މީރާއިންނެވެ.
ކޮމެންޓު ފޮނުވާ