ވ.ރަކީދޫގައި އަނިޔާވެރިގޮތަކަށް މަރާލި މުޙައްމަދު އިބްތިހާލްގެ މަރުގެ މައްސަލާގައި އިހުމާލުވިކަމަށް ތުހުމަތުކޮށް ވަޒީފާއިން ވަކިކުރި މީހަކު ވަޒީފާއިން ވަކިކުރީ ޤާނޫނާއި ޚިލާފަށްކަމަށް ނިންމާ އޭނާއަށް އަލުން ވަޒީފާ ދިނުމަށް ސުޕްރީމް ކޯޓުން ޢަމުރުކޮށްފިއެވެ.
2015 ވަނަ އަހަރުގެ ޖެނުއަރީމަހު ވ.ރަކީދޫގައި އިބްތިހާލްއަށް އެކުއްޖާގެ މަންމަ އަނިޔާކުރުމުން މަރުވި މައްސަލާގައި، އެކުއްޖާއަށް ދޭންޖެހޭ ރައްކާތެރިކަން ދިނުމުގައި އިހުމާލުވިކަމަށް ތުހުމަތުކޮށް އެއަތޮޅު ފެމިލީ އެންޑް ޗައިލްޑް ޕްރޮޓެކްޝަން ސެންޓަރުގެ މުވައްޒަފަކު ވަނީ ވަޒީފާއިން ވަކިކޮށްފައެވެ. ނަމަވެސް އޭނާގެ ފަރާތުން ހުށައެޅި މައްސަލަ ވަޒީފާއާއި ބެހޭ ޓްރައިބިއުނަލްއާއި ހައިކޯޓުންވެސް ނިންމާފައިވަނީ އޭނާ ވަޒީފާއިން ވަކިކޮށްފައިވަނީ ޤާނޫނާއި ޚިލާފަށްކަމަށެވެ. އަދި އޭނާއަށް ވަޒީފާ ދޭންޖެހޭނެކަމަށްވެސް ނިންމާފައިވެއެވެ.
ނަމަވެސް އެމައްސަލަ ސިވިލްސާވިސް ކޮމިޝަނުން ވަނީ ސުޕްރީމް ކޯޓުގައި އިސްތިއުނާފްކޮށްފައެވެ. އެމައްސަލަ ނިންމާ މިދިޔަ ބުރާސްފަތިދުވަހު ސުޕްރީމް ކޯޓުން ކޮށްފައިވާ ޙުކުމުގައި ވަނީ އޭނާއަކީ އެސެންޓަރުގައި އަލަށް ވަޒީފާ އަދާކުރަން ފެށި މުވައްޒަފެއްކަމަށާއި، އެފަދަ ޙައްސާސީ މަސައްކަތެއް ހަވާލުކުރާއިރު އޭނާގެ ޒިންމާއާއި މަސްއޫލިއްޔަތު ބުނެދީ، އެފަދަ ތަމްރީންތައް ދީފައި ހުރުމަކީ ވަޒީފާދޭ ފަރާތުގެ ޒިންމާއެއްކަމަށެވެ. ނަމަވެސް ވަޒީފާއިން ވަކިކުރި މީހާއަށް އެފަދަ މައްސަލަތަކުގައި ޢަމަލުކުރަންޖެހޭނެ އެއްވެސް އިރުޝާދެއް އަދި ތަމްރީނެއްވެސް ދީފައިނުވާކަމަށާއި، އެގޮތަށް އަމަލުނުކޮށް އޭނާގެ ބޮލުގައި ހުރިހާ ޒިންމާއެއް އެޅުވުމަކީ ބަލައިގަނެވޭނެކަމެއް ނޫންކަމަށްވެސް ސުޕްރީމް ކޯޓުގެ ޙުކުމުގައިވެއެވެ. އަދި މިމައްސަލާގައި އޭނާއަށް ޖަވާބުދާރިވުމަށް ފުރުޞަތު ދީފައިނުވާކަންވެސް ޙުކުމުގައި ފާހަގަކޮށްފައިވެއެވެ.
މިމައްސަލަ ސުޕްރީމް ކޯޓުގައި ބެއްލެވީ އެކޯޓުގެ ފަނޑިޔާރު އައިޝާ ޝުޖޫން މުޙައްމަދާއި، ފަނޑިޔާރު ޑރ. އަޒްމިރަލްދާ ޒާހިރުގެ އިތުރުން ފަނޑިޔާރު މަހާޒް ޢަލީ ޒާހިރެވެ. މައްސަލައިގެ ރިޔާސަތު ބެލެހެއްޓޭވީ އައިޝާ ޝުޖޫން މުޙައްމަދެވެ.
އަމިއްލަ ދަރިފުޅަށް އަނިޔާކޮށް މަރާލުމުގެ ކުށުގެ ދައުވާލިބޭ އާފިޔާ މުޙައްމަދުގެ މައްސަލައިގެ ޝަރީޢަތް ކްރިމިނަލް ކޯޓުގައި މިހާރު ވަނީ ނިންމާލާފައެވެ. އަދި މިހާރު އެމައްސލަ އޮތީ ޙުކުމް ކުރުމުގެ މަރުޙަލާގައެވެ.
ކޮމެންޓު ފޮނުވާ