މި އަހަރުގެ މިހާތަނަށް ރާއްޖެއަށް ޒިޔާރަތްކުރި ޓޫރިސްޓުންގެ އަދަދު ބައި މިލިއަނާ ގާތަށް ޖެހިލައިފިއެވެ. ޓޫރިޒަމް މިނިސްޓްރީގެ ތަފާސް ހިސާބުތަކުން ހާމަވާ ގޮތުގައި މިމަހުގެ 10 ވަނަ ދުވަހާ ހަމައަށް 488,878 ޓޫރިސްޓުން ރާއްޖެއަށް ޒިޔާރަތްކޮށްފައިވެއެވެ.

މިއީ މިދިޔަ އަހަރުގެ މި މުއްދަތާ އަޅާބަލާއިރު 4.8 ޕަސެންޓުގެ ކުރިއެރުމެކެވެ. އެހެން ކަމުން، މި ހަފުތާގެ ތެރޭގައި ފުރަތަމަ ބައި މިލިއަން ޓޫރިސްޓުންގެ އަދަދު ހަމަވާނެ ކަމަށް ބެލެވެއެވެ. މިއީ މިދިޔަ އަހަރާ އަޅާބަލާއިރު ޓޫރިޒަމް ރޮނގުން ލިބޭ ވަރަށް އުފާވެރި ކުރިއެރުމެކެވެ.

މިހާރު ރާއްޖެއަށް ދުވާލަކު އެވްރެޖްކޮށް 7,189 ޓޫރިސްޓުން ޒިޔާރަތްކުރާ ކަމަށް ތަފާސް ހިސާބުތަކުން ދައްކައެވެ. ޓޫރިސްޓުންގެ ތެރެއިން އެންމެ ބޮޑު ބައެއް އަންނަނީ ޗައިނާއިންނެވެ. އެ ޤައުމުން މިހާތަނަށް 62,527 ޓޫރިސްޓުން ރާއްޖެއަށް ޒިޔާރަތްކޮށްފައިވެއެވެ. އޭގެ ފަހަތުން ދެވަނައަށް ރަޝިއާ (49,433) އަދި ތިންވަނައަށް އިނގިރޭސިވިލާތް (49,126) ހިމެނެއެވެ. މީގެ އިތުރުން އިޓަލީއިން 46,395 އަދި ޖަރުމަނުވިލާތުން 32,307 ޓޫރިސްޓުން ރާއްޖެއަށް ޒިޔާރަތްކޮށްފައިވެއެވެ. އިންޑިއާއިން މިހާތަނަށް 23,219 ޓޫރިސްޓުން އައިސްފައިވެއެވެ.

ރާއްޖެއަށް ޒިޔާރަތްކުރާ ޓޫރިސްޓުންގެ ތެރެއިން ގާތްގަނޑަކަށް 70 ޕަސެންޓް ޗުއްޓީ ހޭދަކުރަނީ ރިސޯޓުތަކުގައެވެ. މިގޮތުން މި އަހަރުގެ މިހާތަނަށް 337,595 ޓޫރިސްޓުން ރިސޯޓުތަކުގައި ޗުއްޓީ ހޭދަކޮށްފައިވެއެވެ. ގެސްޓްހައުސްތަކުގައި 125,073 ޓޫރިސްޓުން ޗުއްޓީ ހޭދަކޮށްފައިވާއިރު، ހޮޓާތަކުގައި 13,884 އަދި ސަފާރީތަކުގައި 12,037 ޓޫރިސްޓުން ޗުއްޓީ ހޭދަކޮށްފައިވެއެވެ.

ފާއިތުވި އަހަރު ރާއްޖެއަށް 2 މިލިއަން ޓޫރިސްޓުން ޒިޔާރަތްކޮށްފައިވާއިރު، މި އަހަރު 2.3 މިލިއަން ޓޫރިސްޓުން ރާއްޖެއަށް ގެނައުމަކީ ސަރުކާރުގެ މައިގަނޑު އަމާޒެވެ. މިހާތަނަށް ފެންނަ ހިސާބުތަކަށް ބަލާއިރު، މި އަހަރުގެ އަމާޒަށް ވާޞިލްވުމަށް ހިތްވަރުދޭ ކުރިއެރުންތަކެއް ފެންނަމުންދާކަން ފާހަގަކުރެވެއެވެ.