މާލެ (11 މާރޗް 2025) – މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ހުޅުމާލެއިން ބިމެއް ވިއްކައިގެން ސަރުކާރުން 15 ބިލިއަން ރުފިޔާ ހޯދަން މަސައްކަތްކުރާ ކަމަށް ބުނެ މޯލްޑިވްސް ޓްރޭޑް އެސޯސިއޭޝަން (އެމްޓީއޭ) އިން ކަންބޮޑުވުން ފާޅުކޮށްފިއެވެ.
މިކަމަކީ "ސީދާ ފައިސާ ޗާޕުކުރުމާ އެއްފަދަ ޢަމަލެއް" ކަމަށް ބުނެ، މިފަދަ ފިޔަވަޅަކުން ޤައުމުގެ އިޤްތިޞާދަށާއި މުދަލުގެ އަގަށް ކުރާނެ ނޭދެވޭ އަސަރުތަކާމެދު އެމްޓީއޭއިން ވަނީ ކަންބޮޑުވުން ފާޅުކޮށްފައެވެ.
"އެމްއެމްއޭގެ މައިގަނޑު މަސްއޫލިއްޔަތަކީ ރާއްޖޭގެ މަނިޓަރީ ސިޔާސަތު ކަނޑައަޅައި، ރުފިޔާގެ އަގު ހިފެހެއްޓުމެވެ. ސަރުކާރުގެ ޚަރަދުތައް ފޫބެއްދުމަށްޓަކައި މިފަދަ ގޮތަކަށް އެމްއެމްއޭގެ ރިޒާވްތައް ބޭނުންކުރުމަކީ ބައިނަލްއަޤްވާމީ މާލީ އުސޫލުތަކާ ޚިލާފު ކަމެކެވެ" ކަމަށް އެ ޖަމްޢިއްޔާއިން ނެރުނު ނޫސް ބަޔާނުގައި ވިދާޅުވެފައި ވެއެވެ.
އެމްޓީއޭއިން ފާހަގަކުރި ގޮތުގައި، ރައީސް މުއިއްޒު މީގެ ކުރިން ފައިސާ ޗާޕް ނުކުރުމަށް ވައުދުވެވަޑައިގެންފައި ވީނަމަވެސް، 15 ބިލިއަން ރުފިޔާ އެމްއެމްއޭއިން މާލީ ބާޒާރަށް ނެރެފިނަމަ، ރާއްޖޭގެ އިގްތިސާދަށް ނޭދެވޭ އަސަރުތަކެއް ކުރާނެއެވެ. އޭގެ ތެރޭގައި އިންފްލޭޝަން އިތުރުވުމާއި، ރުފިޔާގެ އަގު ދަށަށް ދިއުމާއި، ރައްޔިތުންގެ ދިރިއުޅުމުގެ ޚަރަދު ބޮޑުވުމާއި، ވިޔަފާރިތަކަށް ގެއްލުން ލިބުމާއި، އަދި ބޭރުފައިސާގެ ރިޒާވަށް ބޮޑެތި ގޮންޖެހުންތައް ކުރިމަތިވުން ހިމެނެއެވެ.
މި މައްސަލައާ ގުޅިގެން ސަރުކާރުގެ ކަމާބެހޭ އިދާރާތަކާއި، އެމްއެމްއޭއިން ޢާންމުންނަށް ތެދު މަޢުލޫމާތު ހާމަކޮށްދިނުމަށް އެމްޓީއޭއިން ގޮވާލާފައިވެއެވެ. އަދި ސަރުކާރުގެ ޚަރަދުތައް ފޫބެއްދުމަށް ދެމެހެއްޓެނިވި އުސޫލުތައް ބޭނުންކުރުމަށް ސަރުކާރަށް އިލްތިމާސް ކޮށްފައިވެއެވެ.
"ޚަރަދު ކުޑަކުރުމާއި، ޓެކްސް ނިޒާމް ހަރުދަނާކުރުމާއި، ޒިންމާދާރު ދަރަނީގެ ސިޔާސަތެއް ގެންގުޅުމަކީ މިވަގުތު ރާއްޖެއަށް އެންމެ ބޭނުންތެރި މާލީ ސިޔާސަތުތައް" ކަމަށް އެމްޓީއޭއިން ފާހަގަކޮށްފައިވެއެވެ.
އަދި ރާއްޖޭގެ އިގްތިސާދު ބޮޑެތި ގޮންޖެހުންތަކެއްގެ ތެރޭގައި ވާ މި ދަނޑިވަޅުގައި، ބޭކާރު ޚަރަދުތައް ކުޑަކޮށް، ސިޔާސީ މަގާމްތައް މަދުކޮށް، ސިޔާސީ ވިސްނުމާއި ފިކުރު އެއްކިބާކޮށް، މުޅި ގައުމުގެ އެންމެހާ ރައްޔިތުންގެ މަސްލަހަތަށް ވިސްނެވުމަށްފަހު އިގްތިސާދީ ފިޔަވަޅުތައް އެޅުއްވުމަށް އެމްޓީއޭއިން ސަރުކާރަށް ގޮވާލާފައިވެއެވެ.
މި މައްސަލައާ ގުޅޭގޮތުން އެމްއެމްއޭ އަދި ސަރުކާރުން އަދި އެއްވެސް ބަޔާނެއް ނެރެފައެއް ނުވެއެވެ.
ކޮމެންޓު ފޮނުވާ