ޒަކާތު ފަންޑުން މަތީ ތައުލީމުގެ ސްކޮލަރޝިޕަށް އެދުމުގެ ފުރުޞަތު ރަމަޟާންމަހުގެ ފަހުކޮޅު ހުޅުވާލުމަށް ތައްޔާރުވަމުންދާ ކަމަށް މޯލްޑިވްސް ޒަކާތު ހައުސްގެ ޑިރެކްޓަރ ޖެނެރަލް ފަޟީލަތުއްޝައިޚް ޢިއްޒައްދީން ޢަދްނާން ވިދާޅުވެއްޖެއެވެ.
ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން، ޒަކާތު ހައުސްއިން މީހުން ބިނާކުރުމަށް ޓަކައި އެހީތެރިކަން ފޯރުކޮށްދިނުމަކީ މުހިއްމު ކަމެއްކަމަށާއި، އެގޮތުން މިހާރު ސްކޮލަރޝިޕްއަށް އެދުމުގެ ފުރުޞަތު ހުޅުވާލުމުގެ ކުރިން ކުރަންޖެހޭ މަސައްކަތްތައް ކުރަމުންދާ ކަމަށް ޑިރެކްޓަރ ޖެނެރަލް ވިދާޅުވިއެވެ.
"ޒަކާތު ފަންޑުން ސްކޮލަރޝިޕްއަށް އެދުމުގެ ފުރުޞަތު ހުޅުވާލުމުގެ ކުރިން ކުރަންޖެހޭ މަސައްކަތްތައް މިދަނީ ކުރަމުން. ސްކޮލާރޝިޕްތަކަށް އިއުލާން ކުރުމުގެ ކުރިން ކޮމެޓީން ބަލަންޖެހޭ ކަންކަން މިދަނީ ބަލަމުން." ޢިއްޒައްދީން ޢަދްނާން ވިދާޅުވިއެވެ.
"ޒަކާތު ފަންޑުން މަތީ ތައުލީމަށް އެހީ ދިނުމުގެ އުސޫލު" ގައިވާ ގޮތުން، ޒަކާތު ފަންޑުން ދޭ ސްކޮލަރޝިޕްތަކަކީ ރާއްޖޭގެ ގައުމީ ސަނަދުތަކުގެ އޮނިގަނޑު ލެވެލް 5 އިން ފެށިގެން ލެވެލް 10 ގެ ނިޔަލަށް ހިމެނޭ ކޯސްތަކަށް ދެވޭ ސްކޮލަރޝިޕްތަކެކެވެ. މި ކޯސްތަކުގެ ހުރިހާ ޚަރަދެއް ޒަކާތު ފަންޑުން ހަމަޖައްސައިދޭނެއެވެ.
ސްކޮލަރޝިޕް ދެވޭނީ ހަމައެކަނި އިސްލާމީ ދާއިރާއަށް ކަމަށާއި، މޯލްޑިވްސް ކޮލިފިކޭޝަން އޮތޯރިޓީން ވެލިޑޭޓްކުރާ ކޯސްތައް ހިންގާ އަދި އެ އޮތޯރިޓީން ގަބޫލުކުރާ މަރުކަޒުތަކުން ހިންގާ ކޯސްތަކަށް ކަމަށްވެސް އިއްޒައްދީން ވިދާޅުވިއެވެ. ރާއްޖެއިން ބޭރުގެ ކޯސްތަކަށްނަމަ، އޯއައިސީ ގައުމުތަކުގައި ހިންގާ ކޯސްތަކަށް ސްކޮލަރޝިޕް ދެވޭނެއެވެ.
ޒަކާތު ހައުސްއިން ތައުލީމީ ޚަރަދުތަކުގެ އިތުރުން، ބޭސްފަރުވާގެ ޚަރަދުތަކަށްވެސް އެހީތެރިކަން ފޯރުކޮށްދެއެވެ. އެގޮތުން ދާދި ފަހުން ދިވެއްސެއްގެ މޭ ބަދަލުކުރުމަށް ދެ މިލިއަނަށްވުރެ ގިނަ ރުފިޔާ ޒަކާތު ފަންޑުން ޚަރަދުކޮށްފައިވާ ކަމަށް ޒަކާތު ހައުސްއިން މައުލޫމާތު ދެއެވެ.
ކޮމެންޓު ފޮނުވާ